bwiza.com
Ahabanza » Nyamasheke/ Cyato: Bavuga ko iterambere ryabo ridindizwa no kutagira umuhanda mwiza
Amakuru Politiki

Nyamasheke/ Cyato: Bavuga ko iterambere ryabo ridindizwa no kutagira umuhanda mwiza

?

Abaturage b’umurenge wa Cyato mu karere ka Nyamasheke bavuga ko  bakomeje kubabazwa cyane no kudakorerwa umuhanda Tyazo- Cyato bijejwe n’akarere igihe kirekire,bakaba bagikora ibilometero bigera kuri 25 bikoreye umusaruro ku mutwe ngo babashe kugera ku muhanda  munini wa kaburimbo (kivu belt) bahawe na perezida Kagame kuko ari ho hari amasoko ya Tyazo na Kirambo n’ubundi buryo bubageza ku yandi masoko  manini bigatuma bahera mu bukene bukabije kubera kutawubyaza umusaruro bifuza  kandi ari abakozi ntangarugero.

Ni bimwe mu byo batangarije Bwiza.com,ubwo muri uyu murenge habaga amarushanwa y’imihigo y’imidugudu bagaragaza ibyo bagezeho, aho bavuga ko bakora cyane bagahinga bakeza byinshi bagombye gusagurira n’amasoko,bakorora cyane ariko ayo masoko bagombye gusagurira bakaba ntayo bagira kubera imihanda mibi cyane bafite ituma nta modoka n’imwe itwara abagenzi ihakandagira, n’izitwara imizigo zibigerageje zikarara nzira, moto kugenda no kugaruka ujya ku isoko rya Tyzazo ikaba ari 6.000 kuyabona bikagorana bagahitamo kwirira ibyo bejeje ibindi bigapfa ubusa.

Bavuga ko  kugira ngo bazagere mu isoko rinini rya Tyazo mu murenge wa Kanjongo kare ari ukubyuka saa cyenda z’ijoro bakagenda amasaha 6 yose bikoreye ku mutwe bakagerayo saa tatu za mugitondo bakagurisha,ariko kugira icyo bagarura kitera iwabo ngo babe bagicuruza bikaba ibibazo kuko kongera gufata andi masaha 6 bikoreye bagaruka iwabo ngo biba bikomeye cyane, abatabasha gukora izo ngendo zose bagahera mu bukene bukabije kandi ari abakungu mu buhinzi n’ubworozi.

Nyirahavugimana Véronique umukuru w’umudugudu wa Cyato mu kagari ka Murambi  yagize  ati’’ dushengurwa imitima cyane no guhora twumva ko akarere kacu ari ko gakennye cyane mu gihugu kandi ndahamya ko mu gihugu hose nta warusha umurenge wacu umusaruro kuko imvura hano iboneka ibihe byose,tukeza byinshi cyane,tukorora cyane,ariko biteye isoni n’agahinda kuba nta soko tugira nta n’umuhanda ubasha kutugeza ku muhanda munini perezida wacu Paul Kagame yaduhaye ngo natwe tubashe kuwubyaza umusaruro.’’

Yarakomeje ati “Nk’ubu twatojwe gukorera ku mihigo umudugudu wacu uhora ku isonga mu bikorwa by’ubuhinzi n’ubworozi. Ariko bitumariye iki niba duhingira inda gusa, tudashobora kugurisha ibyo twejeje,tudashobora kubona aho tugurisha amata y’inka zacu,wowe  wumva aka karere kava muri ubwo bukene gute kandi  twebwe ikigega cyako turi mu bwigunge,ko jye mbona bashakira ikibazo aho kitari?’’

Mugenzi we Nkurunziza Abraham ,umukuru w’umudugudu wa Rubeho,akagari ka Rugali na we  ati’’kuvuga kuri uyu muhanda bimaze kuba nk’indirimbo. Ko buri mwaka mu ngengo y’imari y’akarere bashyiramo imihanda uyu ukavugwamo ko nta muhisi n’umugenzi tutawubwira,bakadukangurira gukora cyane ngo twiteze imbere,bo babona byashoboka bite? Wakubaka inzu nziza gute, wagura ikinyabiziga gute nta mafaranga wabonye cyangwa ntacyo kiri bukumarire?  Bave mu magambo bajye mu bikorwa nk’uko perezida wacu ahora abibabwira badukorere umuhanda tuve mu bwigunge,tugere ku muhanda munini  yaduhaye natwe tuwiyumvemo utugirire akamaro.’’

Bavuga ko igihe ibikorwa bizasimbura amagambo uyu muhanda bakawubona nk’uko bamaze igihe kirekire bawizezwa amaso agahera mu kirere, bazakuba inshuro nyinshi umusaruro kuko uzaba ubagirira akamaro n’ibiciro by’ibikomoka ahandi ntibitumbagire cyane,bakazabasha kugera no ku bindi bikorwa by’iterambere birimo santere z’ubucuruzi zikomeye,amazu y’amagorofa n’ibinyabiziga bizabasha kubinjiriza amafaranga bifuza.

Umunyamabanga nshingwabikorwa w’uyu murenge,Ndanga Janvier avuga ko bafite amahirwe menshi y’iterambere kubera ukuntu beza bakanorora cyane,ariko nk’uko babivuga imihanda mibi ibaheza mu bukene ku ifaranga,icyakora ko hari icyizere ko mu ngengo y’imari y’akarere ya 2019-2020 wazakorwa bakabasha kugeza umusaruro wabo ku masoko akomeye,dore ko nta soko na rimwe ry’imyaka uyu murenge ugira kandi bayeza cyane.

Basaba ko ibikorwa byasimbura amagambo uyu muhanda ugakorwa vuba 

Izindi wakunda

Bwiza.com
error: Ntibyemewe