bwiza.com
Ahabanza » Polisi y’igihugu yatangije ubukangurambaga bw ‘ibyumweru 52 ku mutekano wo mu muhanda
Umutekano

Polisi y’igihugu yatangije ubukangurambaga bw ‘ibyumweru 52 ku mutekano wo mu muhanda

 

Kuri uyu wa 13 Gicurasi 2019, Polisi y’u Rwanda ifatanije n’abafatanyabikorwa bayo batangije ubukangurambaga bw’ibyumweru 52 byo kwirinda impanuka zo mu muhanda. Bukaba ari ubukangurambaga bahaye insanganyamatsiko yiswe ‘Gerayo Amahoro’

Umuvugizi wa Polisi y’u Rwanda CP John Bosco Kabera yatangarije RBA ko ubu bukangurambaga buteguwe nyuma yuko bigaragaye ko 80 % by’impanuka zo mu muhanda ziterwa n’imyitwarire mibi y’abashoferi nko kugendera ku muvuduko ukabije, gutwara imodoka basinze,uburangare , kwica amategeko nkana y’umuhanda n’ibindi.

Yakomeje atangaza ko binyuze muri ubu bukangurambaga bwa ‘Gerayo Amahoro’ ,Polisi y’u Rwanda izigisha ibyiciro bitandukanye by’abanyarwanda uburyo bwiza butandukanye bwo gukoresha umuhanda hagamijwe guhindura imyumvire.

Ubu bukangurambaga burareba cyane cyane abanyamaguru, abatwara ibinyabiziga ndetse n’abandi bakoresha umuhanda. Bose bazibutswa uburyo bwiza bwo gukoresha umuhanda.

Ku rwego rw’igihugu ubu bukangurambaga bwatangirijwe mu mujyi wa Kigali muri gare ya Nyabugogo n’umunyamabanga wa leta muri minisiteri y’ibikorwa remezo ushinzwe gutwara ibintu n’abantu bwana Uwihanganye Jean de Dieu afatananyije na DIGP Marizamunda n’abafatanyabikorwa ba Polisi y’igihugu. Ibikorwa byo gutangiza’ Gerayo Amahoro ‘ biri kubera muri gare zose hirya no hino mu gihugu.

Atangiza ubu bukangurambaga , umunyamabanga wa leta ushinzwe gutwara ibintu n’abantu muri minisiteri y’ibikorwa remezo yatangaje ko gutangiza ubu bukangurambaga atari umuhango gusa.

Yagize ati ‘’ Gutangiza ubukangurambaga bw’umutekano wo mu muhanda ,ntabwo ari umuhango gusa, bugamije kwibutsa buri wese ko afite inshingano zo gutuma habaho umutekano wo mu muhanda buri mugenzi akagera iyo ajya amahoro’’

Yakomeje agira ati’’ Mbere y’uko imodoka ihaguruka, umushoferi agomba kubanza kwibwira abagenzi,pulaki z’imodoka atwaye, akababwira ibyo bemerewe n’ibyo babujijwe. Abagenzi nabo bagomba gutanga amakuru ku cyatuma batagerayo amahoro’’

Tubibutse ko ubu bukangurambaga bw’umutekano wo mu muhanda, buzamara ibyumweru 52 bukaba bwatangirijwe muri gare zitandukanye hirya no hino mu gihugu. Aho hazigishwa ibyiciro bitandukanye uburyo bwiza bwo gukoresha umuhanda.

Nkurunziza Viateur @bwiza.com

Izindi wakunda

Bwiza.com
error: Alert: Ntabwo byemewe!!