bwiza.com
Ahabanza » Dufite gahunda ko uzajya asohoka muri gereza atazagarukamo- Minisitiri Busingye
Ubutabera

Dufite gahunda ko uzajya asohoka muri gereza atazagarukamo- Minisitiri Busingye

Minisitiri w’ubutabera akaba n’intumwa nkuru ya leta Johnson Busingye aratangaza ko mu mpinduka u Rwanda rwifuza muri za gereza, ari uko imfungwa n’abagororwa bazisohokamo bafite impamba y’ubumenyi n’imyuga bizabafasha kwibeshaho mu gihe barangije igihano.

Ibi minisitiri Busingye yabitangaje kuri uyu wa kabiri mu ruzinduko yakoreye muri gereza ya Rubavu. Minisitiri Busingye akaba avuga ko leta y’u Rwanda yiyemeje kuzana impinduka muri za gereza aho imfungwa n’abagororwa bigishwa imyuga . Akaba ari yo mpamvu bagomba kuyifata nk’amahirwe akomeye ,mu guteza imbere imibereho yabo mu miryango igihe barangije ibihano ndetse no gukumira ibyaha.

Minisitiri Busingye yagize ati’’ Dufite gahunda ko uzajya asohoka muri gereza atazagarukamo. Ibi byose bizakunda habayeho ubufatanye bwanyu’’ Yakomeje asaba urubyiruko rufungiye muri gereza ya Rubavu gukoresha igihe neza no kwirinda ibyaha.

‘’Urubyiruko muri hano muri gereza ya Rubavu , mwige gukoresha neza igihe cyanyu muzasohokemo mufite icyo mwahigiye kizabafasha kubaho mudasubiye mu byaha’’

Yongeyeho ati’’Turashaka ko usohoka muri gereza ufite umwuga ushoboye gukora , ufite impinduka hari icyo ushoboye gukora cyiza n’amaboko yawe’’

Gereza ya Rubavu ifite imfungwa n’abagororwa bagera ku bihumbi 7011 hafi 70 ku ijana muri bo ni urubyiruko .

Biganjemo abakoze ibyaha birimo gufata ku ngufu, gukoresha no gucuruza ibiyobyabwenge, ubujura , gukubita no gukomeretsa ndetse n’icyaha cya Genoside.

Nkurunziza Viateur @Bwiza.com

Izindi wakunda

Bwiza.com
error: Ntibyemewe