bwiza.com
Ahabanza » Perezida Paul Kagame agiye gusubira mu Bufaransa nyuma y’umwaka avuyeyo
Amakuru Politiki

Perezida Paul Kagame agiye gusubira mu Bufaransa nyuma y’umwaka avuyeyo

Perezida wa Repubulika, Paul Kagame agiye gusubira I Paris mu Bufaransa, aho azaba yitabiriye indi nama ya Viva Technology nk’iyo yitabiriye umwaka ushize yanabonaniyemo na mugenzi we w’u Bufaransa Emmanuel Macron.

Ni ku nshuro ya kabiri, Perezida Paul Kagame azaba yitabiriye inama ya VivaTech, aho muri uyu mwaka wa 2019 biteganyijwe ko izatangira kuwa kane, itariki 16 ikazasoza kuwa 18 Gicurasi I Paris nk’uko tubikesha Jeune Afrique.

Perezida w’u Rwanda ni umwe mu bazafata ijambo muri iyi nama ihuza ibigo by’ikoranabuhanga bigitangira n’abayobozi baturutse hirya no hino ku Isi.

Inama ya Vivatech y’uyu mwaka izitabirwa kandi n’amazina akomeye arimo ay’ibyamamare nka Minisitiri w’Intebe wa Canada, Justin Trudeau, uwahoze ayoboye u Bufaransa, Francois Hollande, Umuhanga mu mibare Cedric Villani, akaba n’umudepite uhagarariye Essonne.

Iyi nama kandi izitabirwa n’igihangange mu gusiganwa metero 100, Usain Bolt, igihangange mu mukino wa Echec kuri ubu akaba ari ambasaderi wa Antivirus Avast,  Garry Kasparov, n’abandi.

Perezida Kagame akaba yaherukaga I Paris mu Bufaransa mu mwaka ushize wa 2018 mu kwezi nk’uku kwa Gicurasi, aho ibigo by’ishoramari mu ikoranabuhanga bigera kuri 60 byo muri Afurika harimo n’ibyo mu Rwanda byamuritse ibyo bimaze kugeraho binabona n’umwanya wo gukorana n’abateza imbere imishinga ijyanye n’ikoranabuhanga ku Isi.

 

Izindi wakunda

Bwiza.com
error: Ntibyemewe