bwiza.com
Amakuru Politiki

Suede: Hasubukuwe iperereza ku byaha bishinjwa Julian Assange washinze Wikileaks

Abashinjacyaha mu gihugu cya Suede kuri uyu wa Mbere basubukuye iperereza ry’ibanze ku birego byo gufata ku ngufu bishinjwa uwashinze urubuga menamabanga rwa WikiLeaks, Julian Assange.

Kongera gutangiza iri perereza biraha u Bwongereza, buherutse guta muri yombi Assange mu kwezi gushize, nyuma yo kutitaba urukiko yari yararekuwe by’agateganyo, gufata icyemezo cyo kumwohereza muri Suede cyangwa muri Leta Zunze Ubumwe za Amerika, aho ashinjwa gushyira ku karubanda in yandiko z’ibanga za guverinoma.

Madamu Eva-Marie Persson, Umuyobozi Wungirije, w’Abashinjacyaha ba leta, yavuze ko hakiri impamvu zituma Assange akekwaho kuba yarakoze icyaha cyo gufata ku ngufu.

Yavuze kandi ko icyemezo cyo muri Gicurasi 2017 cyo guhagarika iperereza kitashingiye ku mbogamizi zijyanye n’ibimenyetso, ahubwo ari ku bibazo byahagaritse iperereza, avuga ko basanze ari ngombwa ko Assange ahatwa ibibazo bushya.

Ni amahirwe yo guhanagura izina rye

Wikileaks ku ruhande rwayo nayo ivuga ko kongera gufungura iperereza ku muyobozi wayo ari amahirwe yo gukura icyasha ku izina rye.

Bivugwa ko kuva yatabwa muri yombi kuwa 11 Mata 2019, hari igitutu cya politiki cyakomeje gushyirwa kuri Suede ngo yongere ifungure iperereza ariko ngo ibi byahozeho nk’uko byemezwa n’Umwanditsi Mukuru Kristinn Hrafnsson mu itangazo bashyize ahagaragara.

Ni mu gihe uwunganira Assange mu mategeko, Per E. Samuelson, yemeza ko yatunguwe cyane n’icyemezo cyo kongera gukora iperereza ku mukiriya we. Yongeyeho ko umukiriya we kubera impamvu za politiki ashobora koherezwa muri Leta Zunze Ubumwe za Amerika azira umwuga we w’itangazamakuru.

Abashinjacyaha bo muri Suede bakoze dosiye ya mbere ya Assange nyuma y’aho uyu munyamakuru ukomoka muri Australia asuriye iki gihugu cya Suede mu 2010. Iperereza ryatangijwe nyuma y’aho abagore babiri bo muri Suede bareze Assange bamushinja kubafata ku ngufu muri Kanama 2010.

Kubera ko byavuzwe yavuye muri Suede akajya mu Bwongereza muri Nzeri 2010, Assange yahise asaba ubuhungiro muri Ambasade ya Ecuador I London muri Kamena 2012 yanga koherezwa.

Kimwe mu birego yaregwaga cy’imyitwarire mibi ishingiye ku gitsina cyateshejwe agaciro mu 2017 bitewe n’uko igihe cyari cyarenze hasigara ikirego cyo gufata ku ngufu nacyo nakomeza gukwepa atazaba agikurikiranweho mu 2020. Iki abashinjacyaha bakaba barananiwe kugikurikirana kuko nta buryo bwari buhari bwo kujyana Assange muri Suede mu gihe yari yihishe muri ambasade.

Kuri ubu rero Assange ari mu gihano cy’igifungo cy’ibyumweru 50 muri Gereza ya Belmarsh muri London azira kuba ataritabye urukiko mu 2012.

Yatawe muri yombi n’Igipolisi cy’u Bwongereza mu kwezi gushize nyuma y’aho Ecuador imwamburiye ubuhungiro imushinja isuku nkeya muri ambasade no kwivanga mu bibazo by’imibanire by’ibihugu byo muri Amerika y’Epfo.

Mu mwaka wa 2010 kandi nibwo Julian Assange n’urubuga yashinze, Wikileaks, batangiye kumvikana hirya no hino ku Isi nyuma yo gusohora amabanga ya Leta Zunze Ubumwe za Amerika yatanzwe na Chelsea Manning wahoze mu gisirikare cya Amerika.

Ni amabanga ya Leta Zunze Ubumwe za Amerika ku bwicanyi butandukanye n’ibindi byaha byakorewe mu ntambara zitandukanye nko muri Afghanistan muri Nyakanga 2010, no muri Irak, mu Ukwakira 2010.

 

 

Izindi wakunda

Bwiza.com