bwiza.com
Amakuru Politiki

Uganda: CMI irashinjwa gushimuta abandi Banyarwanda babiri b’abayobozi muri ADEPR

Amakuru aturuka mu gihugu cy’abaturanyi aravuga ishimutwa ry’Abanyarwanda babiri, Hakizimana Bright na Nsabimana Moses, bombi bakaba ari abayobozi b’itorero rya ADEPR muri Uganda, bivugwa ko bashimuswe ku Cyumweru n’abakozi b’urwego rw’ubutasi mu gisirikare, CMI. Aho baherereye n’uko bamerewe ntabwo bizwi nubwo abo basengana bakeka ko baba barimo gukorerwa iyicarubozo mu Kigo cya gisirikare cya Mbuya, ahari icyicaro cya CMI.

Nk’uko byatangajwe n’abayobozi ba ADEPR I Kigali, ngo ibibazo by’aba byatangiriye mu rusengero ruri ahitwa Kibuye, mu murwa mukuru wa Uganda, Kampala, aho ngo ubwo bateguraga imirimo yo ku Cyumweru amakuru bakiriye ari uko nyuma y’akanya gato Bright ageze ku rusengero, umupolisi nawe yahageze. Ibi byatangajwe na Pasiteri John Karangwa, umuvugizi wungirije wa ADEPR.

Pasiteri Karangwa avuga ko uwo mupolisi yabwiye Pasiteri Hakizimana Bright, mu magambo nta convocation, ko akenewe kuri station ya polisi ya Kibuye.

Ubwo hakizimana uri muri komite nyobozi ya ADEPR muri Kampala, yasabye Nsabimana Moses w’Umudiyakoni kumuherekeza bajyana mu modoka y’umukirisitu wari ugiye gusenga.

Bageze yo, hakizimana ngo yasabye uwabahaye lift gusubira ku rusengero, hashize akanya gato batungurwa no kumva abapolisi baturutse mu biro bababwira ngo bashyire amaboko yabo ahagaragara bahita babambika amapingu.

Ngo ntabwo babwiwe icyaha bakoze, ntibasomewe ibyaha bashinjwa, ndetse ngo ifatwa ryabo ntirikurikije amategeko nk’uko Pasiteri Karangwa akomeza avuga. Karangwa akaba avuga ko ibi babibwiwe n’abakirisitu bagize impungenge babonye hashize amasaha abatwawe batagarutse bakajya kuri station ya polisi kubaza.

Ngo nyuma yo kubazwa cyane n’aba bakirisitu, umwe mu bapolisi amaherezo yaje kugira ati: “Ni CMI yadutegetse guhamagara Pasiteri Bright kandi ni CMI mwakagombye kubaza!”

Pasitoro Karangwa ariko nk’uko iyi nkuru dukesha Virungapost ikomeza ivuga, yahishuye ko ibibazo abagize itorero rabo bahura nabyo bimaze amezi menshi muri Uganda. Ngo ibyabaye ku Cyumweru si ubwa mbere CMI yaba ishimuse abagize itorero rya ADEPR muri Uganda.

Muri Werurwe muri uyu mwaka, Pasiteri Ntakirutimana Theoneste yatawe muri yombi mu buryo nk’ubwakoreshejwe kuri Hakizimana ajyanwa ari kumwe n’undi witwa Cyusa Jean Paul. Uyu ngo yasabwe na polisi kugenda akayizanira ibyangombwa by’itorero, abibashyiriye bamutegeka kujya kuri station ya polisi ya Katwe.

Ubwo yageraga aha kuri station ya polisi ya Katwe, hamwe mu hantu ngo haba urusaku rwinshi kandi haba hari abantu benshi muri Kampala, bafashe ibyo byangombwa bajya mu gisa nk’inama cyamaze nk’iminota 30, basohoka umwe muri bo yambika amapingu Pasiteri Ntakirutimana.

Pasiteri Ntakirutimana yaje gufungurwa ngo amaze amezi abiri akorerwa iyicarubozo ashinjwa kuba intasi ya guverinoma y’u Rwanda, ariko we akemeza ko yazize kuba ari Umunyarwanda gusa. Yavuze ko aho yari afungiye yahasize abandi Banyarwanda benshi bari gukorerwa iyicarubozo.

Pasiteri John Karangwa we akemeza ko bisa nk’aho hari umuntu muri Uganda wiyemeje gushyira hasi ADEPR. Ati: “Buri wese yamenye ko muri iyi minsi inzira yoroshye yo gushyira Umunyarwanda mu bibazo ari ukubwira CMI ko uyu munyarwanda cyangwa uriye ari intasi. Ibyo ni byo bari gukorera abayobozi bacu.”

 

Izindi wakunda

Bwiza.com
error: Alert: Ntabwo byemewe!!