bwiza.com
Amakuru mashya

Akarere ka Huye kaza ku isonga mu kugira umwenda mwinshi w’Ibitaro by’ i Ndera

Ubuyobozi bw’ibitaro bivura indwara zo mu Mutwe bya Ndera butangaza ko bufitiwe  umurengera w’amafaranga  n’uturere ungana na miliyoni 116 Frw. Kuri iyi ngingo, Akarere ka Huye kaza ku isonga na miliyoni 26 Frw mu mwaka w’ingengo y’imari 2018/2019.

Umuyobozi Mukuru  w’Ibitaro bya Ndera, Frere Charles Nkubili avuga ko iyi myenda ituruka ku barwayi baba bavuye mu turere dutandukanye bazanwa kuvurirwa muri ibi bitaro bakuwe ku mihanda.

Nkubili avuga ko aba barwayi bafite ibibazo byo mu mutwe akenshi bazanwa I Ndera na Polisi n’zindi nzego zishinzwe umutekano kandi ko ubwishyu bwandikwa ku turere aba abarwayi baba baturutsemo.

Ati “ Akarere ka Huye kaza imbere n’umwenda mwinshi wa miliyoni 26 Frw, gakurikirwa n’aka  Gasabo gafite umwenda ungana na miliyoni 18 Frw, Kayonza na miliyoni 17 Frw, Musanze na miliyoni 15 Frw. Utundi turere twose hamwe tudufitiye umwenda ungana na miliyoni 23 Frw.”

Nkubili avuga ko iyi myenda ituma ibitaro bigira imikorere mibi ndetse igatuma bagira isura mbi mu igenzura ry’imikoreshereze y’imari ya Leta.

Yashimiye Minisiteri y’Ubutegetsi bw’Igihugu kuba yarakoze ubukangurambaga ariko avuga ko hakiri urugendo rurerure.

Ibi bitaro n’ibyatanzweho urugero mu kugirirwa imyenda. Minisiteri y’Ubuzima itangazo ko ibitaro byinshi bifitiwe imyenda, ingingo ivuga ko iri mu bidindiza itangwa rya serivisi.

Ibi ni ibyatangajwe na Minisitiri Dr Diane Gashumba uyobora Minisiteri y’Ubuzima ubwo yagiranaga ikiganiro n’Inteko Ishinga Amategeko kuwa Mbere w’iki Cyumweru.

Min. gashumba yavuze ko ibitaro bya Kaminuza bya Kigali (CHUK) n’ibya Butare (CHUB) byombi biba bifitiwe ideni rya miliyoni 90 buri mwaka.

Gashumba avuga ko uturere atari two twonyine dufitiye ibitaro bya Leta imyenda kuko hari n’bantu ku giti cyabo badakozwa kwishyura bavuga ko ngo ari ubuntu.

Avuga ko hari n’abatabasha kwishyura 10% bya Mituweli bakabaye bishyura kandi ko hari n’igihe bihumira mu mirari ugasanga na mituweli ntayo bafite, ikintu avuga ko ari ikibazo cy’ingutu.

Yemeza ashimitse ko iyi myenda ituma ibitaro bibura imiti, isuku, kwishyurira abaganga ku gihe. Avuga ko ibi bibazo iyo byihuje bivamo imitangire ya serivisi mbi.

Izindi wakunda

Bwiza.com
error: Alert: Ntabwo byemewe!!