bwiza.com
Ahabanza » Reka twe kuba ingunguru zirimo ubusa- Perezida Kagame abwira abitabiriye ‘Transfrom Africa Summit’
Amakuru Politiki

Reka twe kuba ingunguru zirimo ubusa- Perezida Kagame abwira abitabiriye ‘Transfrom Africa Summit’

Perezida wa Repubulika, Paul Kagame avuga ko ikoranabuhanga rihuza Isi mu buryo butigeze bubaho, bityo ko izi mpinduka zishingiye ku ikoranabuhanga ritavuze kwibagirwa uburyo nk’Abanyafurika basanzwe bakoramo ibintu.

Perezida Kagame yabitangaje atangiza ku mugaragaro inama ya Gatanu yiga ku kwihutisha iterambere rishingiye ku ikoranabuhanga muri Afurika izwi nka ‘Transform Africa Summit’ iteraniye i Kigali kuri uyu wa Gatatu tariki ya 15 Gicurasi 2019, aho ashimangira ko ubumwe bwa Afurika aribwo bwungura Afurika n’abafatanyabikorwa bayo ku Isi hose.

Perezida Kagame yashimiye Smart Africa kuba yarateguye iyi nama ya ‘Transfrom Africa Summit’ no guhuriza hamwe abafatanyabikorwa, abahanga ibishya, n’abashyiraho za politiki, akavuga ko Isi iri mu bihe by’ubukungu bushingiye ku ikoranabuhanga, bityo ko na Afurika itagomba gusigara inyuma.

Avuga ko n’ubwo Abanyafurika batagomba gusigara inyuma ariko ko batatwarwa n’iby’ahandi gusa, ati “Ikoranabuhanga rihuza Isi mu buryo butigeze bubaho. Ibi byatumye kugera ku bumenyi butandukanye byegerezwa benshi ku kigero kingana. Reka rero twe kuba ingunguru zirimo ubusa, ngo dukoreshe umurongo mugari wa interineti mu kwakira ibitekerezo by’abandi gusa”.

Akomeza avuga ko ukwishyira hamwe kw’Abanyafurika ariyo nzira izafasha uyu mugabane gutera imbere kurushaho no kwima inzira abashaka kuwucamo ibice. Yagize ati “Hari abahora bashaka gutandukanya umugabane wacu ku mpamvu zitandukanye. Tuzi neza ko iyi nzira atari iyo gukurikizwa. Afurika ishobora gusa kurinda inyungu z’abaturage no kongera isoko ryayo binyuze mu kwishyira hamwe n’ubuhahirane.

Ku itariki ya 21 Werurwe 2018, nibwo abayobozi b’ibihugu bigize Umuryango wa Afurika Yunze Ubumwe, bashyize umukono ku masezerano ashyiraho isoko rihuriweho n’ibihugu bya Afurika n’andi mabwiriza. Hari mu nama ya 10 idasanzwe ya Afurika Yunze Ubumwe (AU) yabereye i Kigali iyobowe na Perezida Kagame, anatangaza ko gushyiraho isoko rimwe bigaragaza intambwe ikomeye igaragaza ubumwe bw’Abanyafirika.

Akomeza avuga kuri uku kwishyira hamwe kw’abanyafurika binyuze ku ugushyiraho isoko rimwe , Perezida Kagame yagize ati “Isoko Rimwe rya Afurika ubu riri mu ishyirwa mu bikorwa. Tugomba gukomeza gushyira gahunda z’iterambere n’ikoranabuhanga bya Afurika muri uwo murongo[…]Turimo abahanga ibishya n’abafite ibitekerezo bizima benshi. Dufite kandi byinshi twasangiza Isi. Natwe dufite inkuru nyinshi twabarira abandi”.

Iyi nama yitabiriwe na Perezida Ibrahim Boubacar Keita wa Mali na Perezida Kenyatta wa Kenya n’abandi banyacyubahiro barimo Dr LAcina, Umuyobozi Mukuru mushya w’Ubunyamabanga bwa Smart Africa na Dr Hamadoun Toure wagize uruhare rukomeye mu gushyira mu bikorwa iki gitekerezo n’abandi batandukanye.

 

Izindi wakunda

Bwiza.com
error: Ntibyemewe