bwiza.com
Ahabanza » Rusizi: Urubyiruko rwitabiriye ubworozi ruva mu bushomeri no kwandagara
Amakuru Ubukungu

Rusizi: Urubyiruko rwitabiriye ubworozi ruva mu bushomeri no kwandagara

Mu mirenge yose y’Akarere ka Rusizi, ubu harabarurwa amakoperative y’urubyiruko rwatojwe arenga 23 yitabiriye ubworozi bw’inkoko n’ingurube, bibarinda ubushomeri n’ubwomanzi. Byagize kandi uruhare mu kwihaza mu biribwa no kurwanya imirire mibi ndetse no guhaza isoko ryambukiranya imipaka.

Ni inkomezamihigo zatozwe mu byiciro bitandukanye, zafashe umugambi wo kwishakamo ibisubizo, maze bishyira hamwe. Bahereye ku bushobozi buke, bafashijwe n’akarere kubona igishoro cyo gutangira ubworozi bw’inkoko, nyuma bahabwa n’ingurube.

Ishimwe Evode, ni umuyobozi wa Kopertaive yorora ingurube mu murenge wa Bugarama. Igizwe n’abanyamuryango 10 bose bavuye ku rugerero mu byiciro bitandukanye. Avuga ko ingurube 11 bahawe bazifashe neza, kandi kuzitaho bibarinda gusamara no kumva ko bakora.

Avuga ko imishinga bayitangiye nyuma yo kuva ku rugerero

Aho abanyamakuru bamusanze ku kiraro kiri mu mudugudu wa Pera, ibiraro bifite isuku. Avuga ko batangiye bizigamira duke babasha kubona, nyuma umushinga wabo ukaza guhabwa inkunga y’ingurube z’amashashi 10, n’isekurume imwe. Ubu zifite amezi, mu gihe cya vuba zizaba zabyaye.

Ishimwe Evode agira ati, “ ubu twatangiye buri wese yizigamira amafaranga ibihumbi bibiri ku kwezi, ariko umushinga ugiye gutangira byadusabye gutanga ibihumbi 40 tugura iki kibanza cyubatsemo ikiraro. Izi ngurube tuzigaburira ibiryo mvaruganda, buri munyamuryango agira umunsi wo kwirirwa ku kiraro azitaho, ariko dufite n’umuzamu uzirarira”.

Uyu mushinga ufitiye urubyiruko n’abaturage akamaro, kuko umuyobozi wa koperative avuga ko “ifumbire ivuyemo ihabwa abahinzi bakayiteza imboga, zikagaburirwa abana bakava mu mirire mibi. Ikindi ubu twe dufite gahunda yo kutazarenza ingurube 40, murumva ko nizibyara tuzoroza abaturage bakagira ingurube z’ubwoko bugezweho”.

Hirya gato, hari indi koperative yorora inkoko zitera amagi, igizwe n’urubyiruko rwavuye ku rugerero, harimo abayisilamu benshi. Bose hamwe ni 12, abakobwa Batandatu n’abahungu batandatu.

Ku munsi izi nkoko zitera amagi asaga magana atandatu

Bahawe inkoko 1000, haza gupfamo enye. Ubu ku munsi bararuza amagi 680, ku buryo ngo kuri konti bamaze kugiraho amafaranga arenga miliyoni n’igice.

Abanyamakuru b’Impamyabigwi bahahuriye n’abaguzi bari mu modoka ibaruwe mu gihugu cy’u Burundi, ariko ngo banayagurisha muri Congo. Umucungamutungo w’iyi koperative, avuga ko buri munsi haba hari abanyamuryango babiri bazitaho.

Uyu mucungamutungo kandi asanga ubu bworozi bwarabakuye mu bushomeri, bikanabarinda kwandagara. Ati, Iyo niriwe hano nta kurangara, mba ndi ku kazi. Ubu nta musore wanshukisha ibihumbi bibiri ngo anjyane mu ngeso mbi kuko ndakora”.

Umuhuzabikorwa w’iyi koperative, Hussein avuga ko mu cyumweru buri munyamuryango agira amagi ahabwa yo kujyana iwabo mu rugo, mu rwego rwo kurwanya imirire mibi. Anongeraho ko ugize ikibazo cy’amafaranga agobokwa na kopertaive aho kujya gushakira ahandi.

Uzamutse gato mu murenge wa Nzahaha, naho hari abakobwa batojwe, maze bishingira agasoko k’imbuto, bakora n’itsinda ryizigamira amafaranga 1000 buri cyumweru. Benshi muri bo bavuga ko iyo bagabanye bahita bagura amatungo magufi, arimo ingurube, ihene n’inkoko.

Ku bw’umuyobozi w’akarere wungirije ushinzwe iterambere ry’ubukungu, Kankindi Leoncie, ngo intore zigomba kwishakamo ibisubizo. Ati, “ ni ibyo kwishimirwa ko inkomezamihigo zishatsemo ibisubizo, nubwo akarere kabateye inkunga, bahise babigira ibyabo. Urubyiruko rurangije amashuri, ntirwumve ko rutegereje akazi ko mu biro gusa”.

Muri aka karere ka Rusizi, koperative z’urubyiruko rwavuye ku rugerero zimaze guhabwa inkoko ibihumbi 18 mu mirenge 18 ikagize. Nyuma hari andi atanu yahawe izindi nkoko ibihumbi bitanu, andi atanu ahabwa ingurube 11 buri koperative.

Izindi wakunda

1 Igitekerezo

Mutagoma Isaac 17/05/2019 12:29 pm at 12:29 pm

uru rubyiruko rwiteje imbere nibakomerezaho ,baravuga ngo abashyize ntakibananira ,bari munzira nziza nibakomeze biteze imbere

N.b: nasabaga niba ko mwamfasha kubona numero yabamwe muri urwo rubyiruko natwe bakaba batugira inama yuburyo natwe twakwiteza imbere, murakoze.

Subiza

Tanga Igitekerezo

Bwiza.com
error: Ntibyemewe