bwiza.com
Amakuru Umuryango Utuntu n'utundi

Yabonye umuryango we nyuma y’imyaka 33 atawe ku kibuga cy’indege ari uruhinja

Mu gihe yari afite iminsi 10 y’amavuko, Steve Hydes ni bwo yatawe ku kibuga cy’indege cya Gatwick mu mugi wa Londre. Ni ibyishimo byinshi kuri we nyuma yo kubona umuryango we yashatse imyaka 15.

Hashize imyaka 33 Steve Hydes atowe mu bwiherero bw’abagore kuri iki kibuga, afubitswe ikiringiti. Hari mu 1986. Yarezwe n’undi muryango wari ufite abandi bana batatu.

Amaze gukura(mu myaka 18), Hydes yatangiye gushaka umuryango we kavukire. Yagerageje gukoresha ibizamini byo kwa muganga bitandukanye kugira ngo amenye ababyeyi be n’umuryango muri rusange.

Ibyavuye mu bizamini byagaragaje ko nyina atagihari, ariko se n’abavandimwe baracyahari. Avuga ko aba bavandimwe batari bazi ko hari undi muvandimwe bagira.

Ubutumwa Hydes yanditse kuri Facebook bugira buti: ” Inkuru nziza. Nyuma y’imyaka 15 nshakisha, ndabahamiriza ko nge n’itsinda ryamfashije gukora ibizamini, twamenye umuryango wange navukiyemo. Ku bw’amahirwe make, mama ntabwo akiriho, gusa sindamenya uko byamugendekeye. Ariko kandi, nabonye data n’abavandimwe batari banzi.”

Sky News dukesha iyi nkuru, kiravuga ko Hydes yavuzwe kenshi mu bitangazamakuru yiswe ‘Gary Gatwick’,  ubwo yakoreshaga ibizamini ashakisha umuryango we imyaka myinshi.

Yakomeje ashimira abamufashije muri iyi myaka, cyane abaganga bamukoreye ibi bizamini, kugeza ubwo yabonye umuryango we.

Ubwo yashakaga umuryango we, ngo yigeze kugirana ikibazo n’abapolisi ubwo yamenye ko bataye amakuru y’umugore wigeze guhamagara inzego z’umutekano. Uwo yakekwaga ko ari nyina.

Ntiyigeze arakarira umuryango we, ahubwo yawushatse ngo awumenye ndetse awereke n’abana be babiri.

Hydes ubu ufite imyaka 33 y’amavuko aba muri Sussex. Afite umugore witwa Sammy n’abana babiri ari bo: Alanna na Kian.

 

 

Izindi wakunda

Bwiza.com
error: Alert: Ntabwo byemewe!!