bwiza.com
Ahabanza » Abaminisitiri ntibemera ko Mitterrand yagize uruhare muri Jenoside yakorewe Abatutsi
Amakuru Politiki

Abaminisitiri ntibemera ko Mitterrand yagize uruhare muri Jenoside yakorewe Abatutsi

Abari abaminisitiri 23 muri guverinoma y’Ubufaransa, baranenga Raphaël Glucksmann wavuze ko François Mitterrand yagize uruhare muri Jenoside yakorewe Abatutsi mu 1994.

Nk’uko BBC yabitangaje kuri uyu wa 16 Gucurasi, ibi babigaragarije mu nyandiko irimo imikono y’aba baminisitiri uko ari 23 barimo Jack Lang, Michel Charasse, Hubert Védrine, Bernard Cazeneuve, Elisabeth Guigou, Edith Cresson, Roland Dumas n’abandi.

“Ni gute umuntu atangaza biriya kandi u Bufaransa aricyo gihugu cyohereje ingabo zo gutabara mu gihe cya Jenoside ngo zikize abantu, nyuma y’uburenganzira bwatanzwe n’Umuryango w’abibumbye, mu gihe isi yose yari yigize ntibindeba?”. Aya ni amwe mu amagambo akubiye muri uru rwandiko aba baminisitiri bose babarizwa mu ishyaka ry’abasosiyaliste.

Aba baminisitiri bashimangira ko nta bimenyetso bigaragaza ko Ubuaransa bwagize uruhare muri Jenoside.

Glucksmann yatangaje ko mu gihe Mitterand yari ku butegetsi (1981- 1995), igihugu cye cyafashije leta y’u Rwanda yari iriho mu buryo bw’imari na politiki.

U Rwanda rushinja Ubufaransa kugira uruhare muri Jenoside yakorewe Abatutsi mu 1994 ariko ntibubyemera.

Muri Mata, Umukuru w’iki gihugu, Emmanuel Macron  yategetse ko hakorwa iperereza ku ruhare rw’igihugu ayoboye muri iyi Jenoside, binyuze mu itsinda ry’impuguke umunani rizasesengura, ryifashishije inyandiko z’ubutasi, iza gisirikare, izo mu biro bya perezida n’izo muri ambasade.

Abanyarwanda n’inshuti bategereje niba koko iri perereza rizakorwa; ntibibe nk’ibyo ku bwa François Hollande wavuze ko izi nyandiko zigiye gushyirwa ahagaragara ubwo yari ku butegetsi mu 2015 ariko inama y’itegekonshinga itegeka ko ziguma mu bubiko.

Raphaël Glucksmann wemeza ubufatanyacyaha bw’Ubufaransa, yahoze ari umunyamakuru ariko ubu yashinze ishyaka rya politiki ryitwa ‘Place Publique’.

Izindi wakunda

Bwiza.com
error: Ntibyemewe