bwiza.com
Ahabanza » Bugesera: Ubuyobozi bwirije abaturage ku Murenge kubera amabendera yibwe
Amakuru Politiki

Bugesera: Ubuyobozi bwirije abaturage ku Murenge kubera amabendera yibwe

Mu Murenge wa Mwogo, mu  karere ka Bugesera, haravugwa abaturage biriwe bicaye ku Murenge kubera amabendera abiri yaraye yibwe.  Abaturage bahiriwe ni ab’Akagari ka Kagasa umurenge wubatsemo, ari nako kibwemo ayo mabendera.

Kuri uyu wa Kane tariki 16 Gicurasi 2019, mu Kagari ka Kagasa nta muturage wagiye mu mirimo ye uko bisanzwe.  Bose bicaye ku murenge, harimo abafanywe n’amasuka bari bajyanye guhinga, abandi bafatanywe n’amagare bagendagaho.

Mu rukerera bose basabwe kujya ku biro by’umurenge wa Mwogo bamenyeshwa ko bagomba kuhava ari uko amabendera yibwe abonetse.

Ibendera rimwe ryibwe ku kagari ka Kagasa, irindi ryibwa ku rwunge rw’amashuri rwa Kagasa. Nk’uko umuturage umwe abisobanurira Bwiza.com, ngo abanyeshuri nibo bemerewe kujya kwiga, ngo ariko undi wese urengeje imyaka 18 yicajwe ku murenge. Yongeraho ati, “Hari n’abagore bakubiswe bashatse kwihagararaho banga kuza ku Murenge, ubwo bari bazindutse bajya guhinga umuceri mu gishanga cya Rurambi”.

Baribaza icyo amarondo amaze

Uyu muturage avuga ko bari kuryozwa amabendera kandi bishyura irondo ry’umwuga. Ati “Dufite DASSO, inkeragutabara zikora irondo ry’umwuga buri rugo ruzishyura igihumbi mu kwezi, kandi no ku mashuri hari abazamu. Ubu twicaye aha kuva mu gitondo, baravuga ko tuhava amabendera abonetse”.

Biravugwa ko umukozi watekeraga abanyeshuri kuri GS Kagasa yaburiwe irengero, abandi bararira ku kagari no ku ishuri barafunzwe muri kasho y’umurenge.

Abaturage bari ku murenge, bavuga ko iki gikorwa cyo kuhabiriza gihagarariwe na Gitifu w’umurenge wa Mwogo, ukuriye Polisi n’umukozi wa RIB ku karere ka Bugesera.

Umuyobozi wa njyanama y’umurenge wa Mwogo, Mutabaruka Francois Regis avuga ko yamenye ko amabendera yibwe mu gitondo, ariko ko atabwiwe ko abaturage ahagarariye birijwe ku murenge. Cyakora ati, “ubwo bari mu iperereza, njye siho ndi”.

Izindi wakunda

Bwiza.com
error: Alert: Ntabwo byemewe!!