bwiza.com
Ahabanza » Umwuka mubi muri ADEPR/Uganda utumye bamwe bigumura
Amakuru Iyobokamana

Umwuka mubi muri ADEPR/Uganda utumye bamwe bigumura

Ubuyobozi bw’Itorero rya Pentecote mu Rwanda (ADEPR) bwandikiwe ibaruwa n’abagize komite y’Ururembo PCIU/ADEPR (Pentecote Church International of Uganda) babamenyesha ko bagendeye ku bibazo biri muri iri torero, bahisemo kwigenga.

Muri iyi baruwa yandikiwe ubuyobozi bukuru bwa ADEPR, bwamenyeshejwe ko kwigenga babitewe n’ibibazo bavuga ko biri mu itorero muri Uganda, biyemezo guhindura amazina, kwikemurira ibibaza bashinja ubuyobozi bukuru bw’iri torero buri mu Rwanda kutabikemura, gukurikirana konti zaryo bwite,…

Ku ruhande rw’ubuyobozi bukuru bwa ADEPR (mu Rwanda) ntibemera ko ari ururembo rwabo rwigumuye muri rusange, ahubwo buvuga ko ari bamwe mu bayoboke baryo bashatse kugenda.

Muri iyi baruwa, bagaragaje impamvu eshatu zatumye bafata umwanzuro wo gukora bigenga. Iya mbere ikaba ari ugushinja ubuyobozi bukuru bw’itorero buri mu Rwanda kutagira icyo bakemura ku bibazo bamenyeshejwe nyuma y’umwiherero w’abayobozi b’itorero mu turere muri Uganda, birimo iby’umutekano muke.

Bati  “Dusanze mu nyandiko y’umwiherero w’abashumba b’uturere wabaye ku itariki yavuzwe haruguru [26/04/2019] ntacyo mwabikozeho, None inama ihisemo gutora umuyobozi w’inama nkuru nk’uko amabwiriza y’itorero abivuga”.

Mu ngingo ya kabiri bagaragazamo umuyobozi mukuru w’inama bahise batora, bavuga ko ari Rev.Muhawe Théogene, iya gatatu ikaba ibiganiro bitandukanye byagiye biba hashakishwa ibyagarura amahoro, umutekano n’ituze mu itorero rya Uganda.

Bavuze ko mu myanzuro bafashe harimo ubwigenge bw’itorero rya Uganda, gutora umuyobozi wemejwe n’abari imbere muri Uganda. Umuyobozi w’Itorero yabaye Rev.Past. Singirankabo Jean de Dieu, yungirizwa na Muhawe Theogene.

Umujyanama ushinzwe ubukungu ni uwitwa Nahurira Penina, naho umujyanama aba Bataringanya Yosam.

Umuvugizi wa ADEPR, Rev. Karuranga Ephraïm aganira na Bwiza.com, ku murongo wa Telefoni ye igendanwa, yavuze ko atari ururembo rwa ADEPR/ Uganda rwigumuye, ahubwo ko ari bamwe mu bayoboke bashatse kwigenga.

Ati “Ururembo rurahari, bariya ni abashatse kugenda, ni abashatse kugenda naho itorero ryo rirahari”.

Abajijwe icyo nk’ubuyobozi bukuru bwa ADEPR bugiye gukora mu gihe bivugwa ko hari n’umutekano muke muri ryo muri Uganda, ari nacyo cyatumye bamwe bigumura, yasubije agira ati “Twe ntacyo twahita dukora ubu, kuko ntabwo turiyo kandi ururembo rwacu rurahari. Iby’umutekano muke byo uwashatse kugenda ntabura ibyo avuga ariko umutekano muke ni muri rusange ku Banyarwanda bose bari muri Uganda”.

Uyu mwuka mubi uvuzwe mu rurembo rwa ADEPR/ Uganda, mu gihe umubano w’u Rwanda na Uganda utifashe neza. Bamwe mu bayobozi b’iri torero muri Uganda bakaba bamaze iminsi batabwa muri yombi, bamwe bashinjwa kuba maneko z’u Rwanda.

Ikinyamakuru Virunga Post cyatangaje ko hari abayobozi babiri ba ADEPR, Ururembo rwa Uganda batawe muri yombi ku Cyumweru tariki ya 12 Gicurasi 2019 n’abakozi b’urwego rw’ubutasi mu gisirikare cya Uganda (CMI).

Abo ni Hakizimana Bright na Nsabimana Moses bari abayobozi baryo muri Uganda. Mu kwezi kwa Gatatu nabwo ngo uwitwa Pasiteri Ntakirutimana Theoneste, Cyusa Jean Paul na Pasiteri Ntakirutimana nabo ngo batawe muri yombi, bashinjwa kunekera u Rwanda.

Ururembo rwa ADEPR muri Uganda rwashinzwe muri Mutarama 2016, byemezwa ko umukristo wa ADEPR uzajya ajya muri Uganda, kwiga cyangwa gukorerayo, azajya ahabwa urwandiko rw’Itorero rutuma yakirwa muri ADEPR ishami rya Uganda.

Izindi wakunda

Bwiza.com
error: Ntibyemewe