bwiza.com
Imikino

Juventus yirukanye uwari umutoza wayo Massimiliano Allegri

 

Ikipe ya Juventus de Turin yo mu Butariyani yamaze kwirukana uwari umutoza wayo Massimiliano Allegri wari umaze imyaka itanu ayitoza nyuma yo kugira umusaruro mubi mu mikino ya EUFA Champions League.

Ikipe ya Juventus ntabwo yitwaye neza mu mikino ya Champions League muri uyu mwaka , dore ko yaviriyemo muri ¼ cy’irangiza nyuma yo gutsindwa na Ajax ku giteranyo cy’ibitego 3:2 mu mikino ibiri.

Nyuma yo kuvamo, byahwihwiswaga ko uyu mutoza ashobora kwirukanwa.
Juventus yakoze ibishoboka byose kugira ngo yegukane iri rushanwa dore ko yari yanaguze umukinnyi Christiano Ronaldo umenyereye iri rushanwa kugira ngo abafashe kuryegukana ariko umutoza bimunanira kurenga ¼.

Kuri uyu wa gatanu , nibwo ubuyobozi bw’ikipe ya Juventus bwatangaje ko Massimiliano Allegri atazaba ari umutoza wa Juventus mu mwaka utaha w’imikino wa 2019/2020. Gusa uyu mutoza akaba azava mu ikipe ya Juventus nyuma yo kurangiza imikino ya shampiyona isigaye muri uyu mwaka.

Mu itangazo iyi kipe yashyize ahagaragara rigira riti’’ Massimiliano Allegri ntabwo azaba yicaye ku ntebe y’abatoza ya Juventus mu mwaka utaha w’imikino wa 2019/2020’’

Iryo tangazo rikomeza rivuga ko uyu mutoza na perezida w’ikipe Andrea Agnelli bazagirana ikiganiro n’itangazamakuru ku wa gatandatu tariki ya 18 Gicurasi 2019. Kugeza ubu impamvu uyu mutoza yeretswe umuryango, ntabwo yatangajwe.

Uyu mugabo w’imyaka 51 y’amavuko, yageze muri Juventus muri 2014. Akaba yarayifashije kwegukana ibikombe 11 birimo 5 bya shampiyona, 4 by’igikombe cy’igihugu (coppa Italia) ndetse na 2 bisumba ibindi mu Butariyani (Supercoppa Italiana).Yanafashije Juventus kandi kugera ku mukino wa nyuma wa Champions League inshuro ebyeri( 2015 na 2017).

Nubwo ubuyobozi bw’ikipe butatangaje umusimbura we, hari amazina y’abatoza batandukanye bakomeje kuvugwa mu bitangazamakuru bashobora kumusimbura mu gihe gito. Muri ayo mazina harimo Pep Guardiola , Didier Deschamps, Jurgen Klopp n’abandi.

Nkurunziza Viateur @bwiza.com

Izindi wakunda

Bwiza.com