bwiza.com
Ahabanza » Rayon Sports yandagaje Musanze FC bituma ikomeza kwicara ku ntebe y’icyubahiro
Imikino

Rayon Sports yandagaje Musanze FC bituma ikomeza kwicara ku ntebe y’icyubahiro

 

Ikipe ya Rayon sport ikomeje kwicara ku mwanya wa mbere muri shampiyona y’umupira w’amaguru mu Rwanda (ARPL) nyuma yo kwihanangiriza ikipe ya Musanze Fc ikayitsinda ibitego bitatu kuri kimwe(3:1).

Uyu mukino wahuje Rayon Sports na Musanze FC wari umukino wo ku munsi wa 28 wa shampiyona y’umupira w’amaguru mu Rwanda.Uyu mukino ukaba wabereye kuri stade Regional ya Kigali i Nyamirambo.

Rayon Sport yagiye mu kibuga iziko igomba gutsinda kugira ngo ikomeze kongera amahirwe yo kwegukana igikombe cya shampiyona cy’uyu mwaka. Ikipe ya Musanze yo yarwanaga no kwirinda gutsindwa kugira ngo yirinde kumanuka mu cy’iciro cya kabiri dore ko iri ku mwanya wa 12 n’amanota 32.

Umukino watangiye ikipe ya Rayon Sport isatira mu buryo bukomeye dore ko yari iri imbere y’abafana bayo. Gusa nubwo Rayon Sports yasatiraga, na Musanze yacishagamo igasatira binyuze kuri ba rutahizamu bayo barimo Kambale salita Gentil. Igice cya mbere cyaje kurangira Musanze Fc itsinze Rayon Sports igitego kimwe ku busa cyatsinzwe na Cedric Mugenzi.

Rayon sport yatangiye igice cya kabiri isa n’iyariye amavubi kuko yatangiye isatira mu buryo bukomeye kugira ngo ishake uko yakwishyura igitego yari yatsinzwe. Binyuze kuri kapiteni wa Rayon Sport Manzi Thierry , yaje kwishyura igitego ku munota wa 48 w’umukino.

Rayon sport yakomeje gusatira bituma ibona igitego cya kabiri ku munota wa 58 gitsinzwe na Michael Sarpong. Umukinnyi Imanishimwe Djabel yaje gushyiramo agashinguracumu ku munota wa 67 nyuma yo kwandagaza ba myugariro ba Musanze Fc.

Gutsinda uyu mukino kwa Gikundiro bitumye ikomeza kuyobora shampiyona n’amanota 66, aho irusha mukeba wayo APR FC amanota 4 iri ku mwanya wa kabiri. Iyi kipe y’ingabo z’u Rwanda ikaba iramanuka mu kibuga ku wa 18 Gicurasi 2019 aho izakina na AS Muhanga . APR FC irasabwa gutsinda kugira ngo ikomeze yotse igitutu Rayon Sport.Nyuma y’uyu mukino Musanze Fc igumye ku mwanya wa 12 n’amanota 32.

Insinzi Rayon sport ibonye uyu munsi, iyongereye amahirwe yo kwegukana igikombe. Iyi kipe ya rubanda mu gihugu isigaje imikino ibiri gusa kugira ngo shampiyona irangire. Rayon Sport irasabwa gutsinda imikino yose isigaye kugira ngo yegukane igikombe.

Nkurunziza Viateur @bwiza.com

Izindi wakunda

Bwiza.com
error: Alert: Ntabwo byemewe!!