bwiza.com
Ahabanza » RDC: FARDC yivuganye inyeshyamba eshatu i Minembwe izindi zirafatwa
Amakuru Politiki

RDC: FARDC yivuganye inyeshyamba eshatu i Minembwe izindi zirafatwa

Inyeshyamba eshatu ziciwe mu mirwano yazihuje n’igisirikare cya Congo, FARDC, kuwa Kabiri ushize muri Teritwari za Fizi na Minembwe, ho muri Kivu y’Amajyepfo nk’uko amakuru yashyizwe ahagaraga n’igisirikare avuga. Aya makuru akaba avuga ko izindi nyeshyamba enye zafashwe ari nzima ndetse intwaro zazo zigafatwa.

Igitero cya mbere cyagabwe ku muhanda uzwi nka Route nationale No 5, muri Teritwari ya Fizi. Inyeshyamba z’uwihaye ipeti rya General, Amuli Yakutumba zageragezaga gutungura ingabo za FARDC zifite ibirindiro ahitwa Misisi, hafi ya Lulimba.

Ingabo za Congo muri batayo ya 221 zahise zitabara zisubiza inyuma umwanzi hapfa inyeshyamba imwe izindi enye zifatwa ari nzima.

Kuri uwo munsi, akandi gatsiko k’abantu bitwaje ibirwanisho k’uwitwa Bilozo Shambuke kagabye igitero ku birindiro bya gisirikare mu Minembwe, mu misozi miremire yo muri Uvira.

FARDC yirwanyeho mu mirwano yamaze amasaha menshi nk’uko bitangazwa na Radio Okapi, hapfa inyeshyamba ebyiri intwaro zazo zirafatwa.

Umuvugizi wa gisirikare wungirije w’Akarere ka 33 ka gisirikare, yavuze ko abaturage bo muri ibi bice byabereyemo imirwano batagomba kugira ubwoba kubera ko hari ingabo zo kubacungira umutekano.

Ibi bitero bikaba bije mu gihe Igisirikare cya Congo, FARDC, gikomeje gushaka uko cyahosha amakimbirane ashingiye ku moko akomeje kugaragara mu misozi miremire ya Uvira.

 

Izindi wakunda

Bwiza.com