bwiza.com
Ahabanza » Thailand: Imbwa yatabaye uruhinja rwashyinguwe ari ruzima
Amakuru mu mahanga Umuryango Utuntu n'utundi

Thailand: Imbwa yatabaye uruhinja rwashyinguwe ari ruzima

Imbwa yavunitse akaguru yitwa Ping Pong yo muri Thailand yatabaye ubuzima bw’uruhinja rwari rwashyinguwe na nyina w’imyaka 15.

Hari ku wa gatatu muri iki cyumweru, ubwo abahinzi bakoreraga mu gace ka Nong Kham, mu majyaruguru ashyira uburasirazuba bw’umurwa mukuru wa Bangkok, babonaga imbwa iraha, bagira amatsiko yo kureba icyo ishaka.

Aba bahinzi barahageze, basanga hari amaguru y’uruhinja ava mu butaka; ni ko kumutabara, bamujyana ku bitaro.

Umubyeyi w’uru ruhinja ufite imyaka 15 y’amavuko avuga ko yashyinguye uru ruhinja kubera ko yari afite ubwoba ko se yamutonganya ngo “kuko yatwise akanabyara”. Icyakoze nyuma yo gutabarwa k’uyu mwana, ababyeyi b’uyu mukobwa bavuga ko baramwirerera. Baremeza kandi ko ubu uruhinja rumeze neza.

Umupolisi, Lt. Col. Panuwat Puttakam avuga ko uyu mukobwa ari gusuzumwa n’abashinzwe ubuzima bwo mu mutwe kubera ko afite ubwoba bwinshi nk’uko The Guardian ibitangaza. Yicuza aya mahano yakoze kuko avuga ko yabikoze atabitekerejeho. Ngo yari afite ubwoba ko ababyeyi be bamenya ko atwite.

Nyiri Ping Pong, Usa Nisaika avuga ko yayitunze kuva mu buto bwe. Mbese yamubereye nziza. Avuga uburyo yatabaye uruhinja.

“Numvaga imbwa imokera mu myumbati, njya kureba ikibaye. Nasanze iraha, ubwo ni ko amaguru y’umwana yavumbutse.”

Iyi mbwa igendesha amaguru atatu gusa kubera ko akandi imodoka yarakagonze. Nisaika avuga ko yakomeje kuyitunga kubera ko yubaha kandi ari yo kwizerwa. Yongeyeho ko imufasha iyo agiye kureba ishyo rye.

Iki cyaha uyu mwangavu yakoze gishyirwa mu kiciro cyo kugerageza kwica. Icyakoze The Guardian ntiyigeze ivuga icyo amategeko mpanabyaha avuga ku cyaha nk’iki.

Izindi wakunda

Bwiza.com
error: Alert: Ntabwo byemewe!!