bwiza.com
Ahabanza » Umuryango wa Gikundiro Rehema na Claude bagabiye inka uwacitse ku icumu
Amakuru Kwibuka

Umuryango wa Gikundiro Rehema na Claude bagabiye inka uwacitse ku icumu

Tariki ya 17 Gicurasi 2019, umuryango wa na Ishimwe Claude na Gikundiro Rehema wagabiye inka y’inzungu ndetse unaremera umuryango wa Nzamurambaho Deo na Uwizeyimana Grace batuye mu Karere ka Gasabo ho mu murenge wa Rusororo mu rwego rwo kubakomeza banashima Imana yarize uyu muryango .

Ishimwe Claude na Gikundiro Rehema kuri ubu batuye muri Leta zunze Ubumwe z’Amerika bavuze ko bahisemo gushima Imana ku umunsi w’amavuka wa Gikundiro bakabikora basha umwe mu muryango wacitse ku icumu babaremera mu kubaha inka , kubaha ibyo kurya no kurihira umwana ishuri ndetse no kubafasha kubatangira ubwisungane mu kwivuza kugeza igihe Imana izaba ikibatije umwuka wo kubaho.

Claude Ishimwe we na Madame we Gikundiro Rehema

Mu ubutumwa bwa Claude Ishimwe we na Madame we Gikundiro Rehema, bavuze ko Imana yahisemo umuryango wa Nzamurambaho ngo abe ariwe bifatanya gushima Imana kandi banifatanya gufatana mu mugongo. Ati: “niwowe Imana yahisemo ngo twifatanye gushima Imana ndetse tunagufate mu mugongo kuko Madame (Gikundiro Rehema ) yavutse mu gihe kimwe Jenoside yakorerwamo Abatutsi, twahisemo Gushima Imana tunagufata mu mugongo ngo tukubwire ko utari wenyine turagukunda kandi tukwitayeho.”

Nzamurambaho Deo na Uwizeyimana Grace n’abana babo Ntwali Josua na Akimbabazi Happiness

Claude akomeza avuga ko bazakomeza gufasha uyu muryango wa Nzamurambaho muburyo butandukanye burimo ubwo kumufasha kwishyurira umwana we umwe amashuri kugeza arangije no kubashakira ubwisungane mu kwivuza, ariko ikiruta ibindi akaba ari ukumubera umuryango no kumuba hafi bamwereka ko atari wenyine nubwo Jenoside yamutwariye abavandimwe be.

Karasira Steven wari uhagarariye umuryango wa Claude

Umunyamakuru Karasira Steven, wari uhagarariye umuryango wa Claude na Gikundiro yatangarije bwiza.com ko iki gikorwa cyakozwe biturutse ku isaburu ya Gikundiro hanyuma babihuriza no kuba abanyarwanda bari mu minsi ijana yo kwibuka Jenoside yakorewe Abatutsi, bahitamo gushima Imana kandi banafata mu mugongo umwe mu miryango yarokotse bawugabira inka ndetse banawuremera mu buryo bwo kubaha ibintu bitandukanye.

Ati : “ Claude na Gikundiro bakoze ibi mu rwego rwo gushima Imana yabarinze ndetse banifatanya n’abayarwanda mu rwego rwo kwibuka niko gushakisha umuryango bafasha mu kuwuha inka n’ibindi hagamijwe kumufasha no kumva ko atari wenyine ahubwo bafatanye gushima Imana kandi banibuke banatanga ibyiringiro nk’abantu basenga kandi bizera Imana.”

Steven Karasira avuga ko mu byifuzo by’umuryango wa Claude na Gikundiro iki gikorwa cyo gufasha no kuremera kizahoraho mu bushobozi Imana izagenda ibaha.

Nzamurambaho Deo, amaze kwakira inka yahawe n’umuryango wa Claude na Gikundiro , yavuze ko Jenoside yamutwaye umuryango urimo abavandimwe be ndetse imuvutsa amahirwe yo kwiga asigarana na Papa we nawe waje gupfa mu minsi ishize. Yakomeje avuga ko yari asanzwe akeneye inka nubwo ntayo yari afite ariko kuri ubu abona inka ahawe igiye guhindura ubuzima mu muryango we.

Ati : Jenoside iba sinabashije kugira amahirwe yo kwiga, nakomeje kurwana n’ubuzima mfatanyije na Madame wanjye , mu byukuri inka nikintu nkunda kuko najyaga nahita hano k’umusaza witwa Rishard nkaza kureba izo atunze , urumva rero ko iyi nka hari ikintu igiye guhindura, ntabwo tuzongera kugura amata yo ku igare , abana bagiye kujya babona amata, iyi nka igiye guhindura ibintu.

Nzamurambaho n’umugore we Uwizeyimana Grace bavuga ko batangajwe no no kubona inka kuko Imana yasohoje icyo yari yaravuze, bityo bakaba bashimira umuryango wa Claude na Gikundiro wabatekerejeho batari baziranye bakaba babasabira umugisha ndetse uko bazajya basenga bazajya babasabira ku Mana.

Indirimbo ya Gikundiro Rehema IMPORE Rwanda

Ishimwe Claude bahoze na Gikundiro Rehema bari abakisito b’itorero ADEPR, Gikundiro yari umuririmbyi ukomeye muri korali Shalom yo muri ADEPR Nyarugenge ndetse na Alarm Ministries. Gikundiro Rehema n’umugabo we Ishimwe Claude basezeranye imbere y’Imana tariki 03/03/2018 mu muhango wabereye mu Rwanda. Nyuma yo kurushinga, aba bombi bahise bajya kuba muri Amerika. Tariki 7 Ukuboza 2018 bibarutse imfura yabo y’umuhungu bahaye izina rya Marvin Wesley ISHIMWE.

Inka yahawe umuryango wa Nzamurambaho

Izindi wakunda

Bwiza.com
error: Alert: Ntabwo byemewe!!