bwiza.com
Amakuru mashya Imikino

Umuyobozi wa Simba SC yemeje ko abakinnyi barimo Haruna Niyonzima bazagenda

Umuyobozi w’ikipe ya Simba muri Tanzania, Swedy Mkwabi yatangaje ko Haruna Niyonzima, Emmanuel Okwi na Jonas Mkude bazava muri iyi kipe amasezerano narangira.

Ubu ngo bemerewe kugirana ibiganiro n’andi makipe, dore ko mu masezerano bafite, hasigaye ukwezi gusa. Amategeko y’Ishyirahamwe ry’Umupira w’Amaguru ku Isi (FIFA) avuga ko umukinnyi ubura amezi atandatu ngo amasezerano ye arangire, aba yemerewe kugirana ibiganiro n’amakipe amushaka.

Emmanuel Okwi we yamaze kumvikana na Kaizer Chiefs yo muri Afurika y’Epfo.

Global Publishers-Mkwabi yavuze ko bari gutegura umwaka w’imikino utaha, ku buryo bazaba bafite abakinnyi bafite ubushobozi bwo gutwara shampiyona ndetse bakitwara neza mu mikino mpuzamahanga. Yanavuze ko adashobora kwifuza ko hari umukinnyi wava muri iyi kipe mu gihe umutoza Patrick Asseums abona agomba kuyigumamo.

Yongeyeho ko Haruna, Okwi na Mkude bari muri gahunda z’umutoza zo kurekurwa.

“Icyo dukora nk’ikipe ni ukureba ahari intege nke, tugashaka abakinnyi bafite ubushobozi kugira ngo dushobore guhatana mu marushanwa mpuzamahanga.” Mkwabi avuga ku cyo Simba yimirije imbere.

Yavuze ko bitoroshye kurekura abakinnyi nk’aba ariko ngo barashaka abakinnyi bisumbuyeho.

“Ntibiba byoroshye kurekura abakinnyi nka Okwi, Haruna na Mkude bose bubatse ibigwi kandi bari bagikenewe muri Simba, gusa icy’ingenzi dukora ni ukureba za ntege nke, tugashaka amaraso mashya kandi meza kurushaho kugira ngo turenge uwego turiho.”

Mkwabi yakomeje yitsa ku marushanwa mpuzamahanga, avuga ko bagomba gushyiramo agatege ku buryo ubutaha bazarenga nko mu cya 4 cy’irushanwa ry’amakipe yabaye aya mbere iwayo (CAF Champions League). Uyu mwaka, Simba iyi yasezerewe na TP Mazembe yo muri RDC muri ¼ cy’irushanwa.

Izindi wakunda

Bwiza.com