bwiza.com
Ahabanza » RURA yamaze gukora inyingo ku buryo ikibazo cy’itumanaho ku batunze telefone cyakemuka
Amakuru mashya mu Rwanda

RURA yamaze gukora inyingo ku buryo ikibazo cy’itumanaho ku batunze telefone cyakemuka

Mu duce dutandukanye tw’igihugu, cyane nko mu byaro, babangamiwe no kuba batunze telephone ariko bakaba badashobora guhamagara cyangwa ngo bahamagarwe kubera ko nta minara ihari. Ikigo cy’Igihugu Ngenzuramikorere cyamaze gukora inyigo kigiye gukemura iki kibazo.

Iki kibazo kiboneka cyane ku bantu batuye mu mibande; aho bisaba ko burira imisozi cyangwa bagashaka ahantu hegutse kugira ngo bashobore kuvugana n’inshuti, abavandimwe, abakoresha, abakozi cyangwa se abagenerwabikorwa.

Abaturage bavuga ko uburyo bwo kubona cyangwa gutanga amakuru butashoboka ku mpamvu z’iki kibazo.

Bati: “Nta internet (murandasi), ntushobora guhamagara cyangwa ngo uhamagarwe ndetse no kohereza ubutumwa ni ikibazo.”

Ibi bibazo by’abaturage, ni na byo abayobozi batandukanye bayobora utu duce bakunze guhura na byo, ku buryo bibasaba kuva mu biro cyangwa bakajya mu migi kugira ngo bohereze raporo cyangwa babone andi makuru abareba.

Iki kibazo kandi, Umukuru w’Igihugu, Paul Kagme yakigarutseho ubwo yavugaga ku bantu bafata iminara yo hanze, bikaba imbogamizi ku itumanaho hagati y’abo imbere mu gihugu. Ni ku itariki 8 na 9 Gicurasi, ubwo yari yasuye uturere twa Burera na Musanze, mu ruzinduko rw’iminsi itatu yari yagiriye mu ntara y’Amajyaruguru n’Uburengerazuba.

Protais Kanyankore, uhagarariye ishami ry’itumanaho muri RURA yabwiye Radio Ijwi ry’Amerika dukesha iyi nkuru ko icy’ingenzi ari uko buri wese yagira itumanaho.

Nk’igisubizo cy’iki kibazo, Ikigo Ngenzuramikorere, RURA kivuga ko kigiye kubaka iminara 64, ariko kikazibanda cyane ku mipaka y’igihugu. Kuri iyi mipaka hazubakwa iminara 45 kugira ngo hakemurwe ikibazo cy’abayituriye bafata iminara yo hanze, bigatuma badashobora kuvugana n’abo imbere mu gihugu. Indi minara 19 izubakwa mu bice byo hagati mu gihugu bitewe n’aho ibibazo bizaba bikigaragara cyane. Iyi gahunda kandi ngo igomba kumara uyu mwaka irangiye.

Ku bufatanye na Minisiteri y’Ubutegetsi bw’Igihugu na sosiyete z’itumanaho, RURA ivuga ko izongera gukora isuzuma iki kiciro cyo kubaka iyi minara 64 kirangiye kugira ngo ahaba hakiri ibibazo hamenyekane, bikemurwe.

Raporo ya RURA yasohotse mu mpera 2018 igaragaza ko abasaga 78 % b’Abanyarwanda bari batunze telephone, bavuye kuri 76.1% byo muri raporo yari yarasohotse muri Kamena 2017. Abasaga 5,500,000 bakoreshaga interneti mu 2018, bari bavuye kuri 4,400,000 bayikoreshaga mu 2016.

Izindi wakunda

2 Ibitekerezo

adam 19/05/2019 10:19 pm at 10:19 pm

yewe icyo cyo nicyo,rwose RRA irabayesheje umuhigo,nkomumajyepfo icyokibazo cy,ama Network kirahabonekacyane,nkahitwa zanyabikenke,nyakabanda no mumurenge warugalika mukarere ka kamonyi,harimo,imidugudu utabarizamo internet,yewe noguhamagara barabyibagiwe,

Subiza
Uwimana Sammy 19/05/2019 10:49 pm at 10:49 pm

Bazarebe pe ex:Rulindo hagati yimisozi yaza kiyanza na murambi ntarezo zihaba nukuri ra imisozi ngufate rezo?

Subiza

Tanga Igitekerezo

Bwiza.com
error: Alert: Ntabwo byemewe!!