bwiza.com
Amakuru Politiki

RDC: Hatangajwe igihe umurambo wa Etienne Tshisekedi uzacyurirwa i Kinshasa

Umurambo w’umunyapolitiki Etienne Tshisekedi uzacyurwa I Kinshasa kuwa Kane, ku itariki 30 Gicurasi uhite ujyanwa mu buruhukiro bw’ibitaro byitwa Hôpital du Cinquantenaire nk’uko byatangajwe kuri uyu wa Kabiri, itariki 21 Gicurasi na minisiteri y’ububanyi n’amahanga ya Congo.

Biteganyijwe ko ku itariki 31 Gicurasi umurambo we uzashyirwa kuri Stade des Martyrs kugirango abaturage ba Congo bamusezere, mu gihe azashyingurwa bukeye ku itarki ya 01 Kamena.

Nk’uko gahunda iteye, gukura umurambo wa Etienne Tshisekedi mu buruhukiro bwa Hôpital du Cinquantenaire bizakorwa n’umuryango we gusa ndetse n’abatumiwe n’umukuru w’igihugu.

Kuri iyi tariki ya 01 Kamena Etienne Tshisekedi akaba azazamurwa akagirwa Intwari y’Igihugu nk’uko iyi nkuru dukesha Radio Okapi ikomeza ivuga.

Muri Mata 2018, ibiganiro hagati ya guverinoma, umuryango wa Etienne Tshisekedi n’ishyaka UDPS yashinze, hashyizwe umukono ku masezerano hagati y’izi mpande eshatu ku mitegurire y’ishyingurwa rya se wa Perezida Felix Tshisekedi ahazwi nka Palais du Peuple. Komisiyo idasanzwe igizwe n’abantu 9 yashyizweho ngo itegure iryo shyingurwa.

Leta ya Congo ikaba yariyemeje kuzatanga amafaranga yose azakenerwa mu gushyingura nyakwigendera.

Biravugwa ko icyurwa ry’umurambo wa Tshisekedi I Kinshasa ryari ryabanje guteza ubwumvikane bucye hagati y’umuryango, ishyaka rye na guverinoma ya Kabila.

Kuwa 11 Werurwe 2017 hakaba hari hatangajwe ko umurambo wa Tshisekedi ugomba gucyurwa ariko ntibyaba. Icyo gihe izo mpande uko ari eshatu zikaba zitarumvikanaga ku hantu agomba gushyingurwa no ku mitegurire y’ishyingurwa.

Etienne Tshisekedi aheruka muri Repubulika iharanira Demokarasi ya Congo kuwa 24 Mutarama 2017, aho yavuye yerekeje I Buruseli mu Bubiligi agiye kwivuza, akaza gupfa nyuma y’icyumweru kuwa 01 Gashyantare ku myaka 84 y’amavuko.

 

 

Izindi wakunda

Bwiza.com