bwiza.com
Ahabanza » Sankara yemeye ibyaha byose ashinjwa atangaza ko yitandukanyije na FLN
Amakuru Politiki

Sankara yemeye ibyaha byose ashinjwa atangaza ko yitandukanyije na FLN

Nsabimana Callixte, uzwi nka Sankara wari umuvugizi w’umutwe w’inyeshyamba za FLN zirwanya ubutegetsi bw’u Rwanda, yemeye ibyaha byose ashinjwa uko ari 16 abisabira imbabazi, yemera ko uyu mutwe we watsinzwe kandi nta cyerekezo utanga.

Ibi byabaye kuri uyu wa Kane, itariki 23 Gicurasi ubwo yagezwaga bwa mbere mu rukiko ubushinjacyaha bukavuga ko bumukurikiranyeho ibyaha 16.

Mu byaha ashinjwa harimo kurema umutwe w’ingabo zitemewe, icyaha cy’iterabwoba ku nyungu za politiki, gukora no kugira uruhare mu bikorwa by’iterabwoba, gutanga amabwiriza mu bikorwa by’iterabwoba, ubwicanyi n’ubwinjiracyaha mu bwicanyi, kugambana no gushishikariza abandi iterabwoba n’ibindi.

Ni ibyaha bivugwa ko yakoze mu bihe bitandukanye no mu bihugu bitandukanye birimo Afurika y’Epfo no mu turere tw’igihugu nka Nyamagabe na Nyaruguru.

Ubwo yahabwaga ijambo, Sankara yasabye imbabazi yemera ko umutwe wa FLN watsinzwe kandi ko nta cyerekezo utanga.

Yavuze ko kuba harishwe abasivili nta kindi yakora uretse kwemera ugutsindwa yagizwe nk’umwe mu bari abayobozi.

Yagize ati:”Niyo mpamvu imbere yanyu nyakubahwa mucamanza, nsaba imbabazi mbikuye ku mutima abantu bose bagizweho ingaruka na biriya bitero, abitabye Imana ibahe iruhuko ridashira, nkaba nsaba imbabazi Abanyarwanda, nkasaba n’imbabazi Umukuru w’Igihugu.”

Yakomeje avuga ko asanga “FLN atari inyeshyamba zitanga icyizere akaba ari nayo mpamvu nitandukanyije na FLN n’ibindi bazakora.”

Ku kijyanye no kuba yahise yemera ibyaha ataruhanyije, Sankara avuga ko, “Nk’umuntu wize amategeko nzi inyungu umuntu agira iyo yemera ibyaha n’iyo abihakana.” “N’inyoni zo mu biti zabinshinja.”

Callixte Nsabimana alias Sankara kandi yemeye icyaha cyo gukorana na leta z’amahanga anagisabira imbabazi, ashimangira ko ibyo ubushinjacyaha bumurega butamubeshyera ku mubano yagiranye n’abasirikare bakuru b’u Burundi na Uganda.

Sankara akaba yashinjwe kuba muri Werurwe yarabonanye n’umusirikare w’u Burundi, Major Bertin alias Moses, ukora mu butasi bwo hanze y’igihugu. Bimwe mu byo baganiriye ngo harimo guhuza FLN n’ingabo za ba Colonel Kanyemera, ngo bafatanye ibikorwa mu bitero ku Rwanda.

Ngo byari kumufasha kandi kubasha kubonana na Brig. Gen. Abel Kandiho uyobora urwego rwa gisirikare rushinzwe iperereza muri Uganda (CMI), aho bumvikanye ko Nsabimana yavugana na Captain Sande Charles akamufasha nk’inshuti ya Brig. Gen. Kandiho, kandi ngo byarakozwe, uko guhura kwasabwaga kuraboneka.

 

 

Izindi wakunda

2 Ibitekerezo

Nsabimana Callixte (Sankara) yasobanuye uko abayobozi b’u Burundi na Uganda bafasha FLN - bwiza.com 23/05/2019 1:04 pm at 1:04 pm

[…] Sankara yemera ibyaha byose aregwa anasaba imbabazi Perezida […]

Subiza
Kigali: Nsabimana Callixte (Sankara) yakatiwe gufungwa iminsi 30 y'agateganyo - bwiza.com 28/05/2019 4:55 pm at 4:55 pm

[…] Sankara yemeye ibyaha 16 byose ashinjwa n’ubushinjacyaha anabisabira imbabazi […]

Subiza

Tanga Igitekerezo

Bwiza.com