bwiza.com
Ahabanza » Uganda yashyizeho itegeko rihana abafasha abana bo ku muhanda
Amakuru Ubuzima Umuryango

Uganda yashyizeho itegeko rihana abafasha abana bo ku muhanda

Inteko ishinga amategeko ya Uganda yatoye itegeko rihana abaha abana bo ku muhanda ibiryo, amafaranga n’izindi mpano.

BBC dukesha iyi nkuru itangaza ko iyi nteko yemeje ko uzafatwa agira icyo aha aba bana, azakatirwa igifungo cy’amezi atandatu cyangwa se acibwe ihazabu y’amadolari y’Amerika 11.

Iyi nteko ifashe umwanzuro kuri iri tegeko kugira ngo bace umuco wo gusabiriza no kohereza abana ku mihanda mu bucuruzi no mu buraya.

Umuyobozi w’umugi wa Kampala, Erias Lukwago yatangaje ko hazahanwa kandi abagurisha aba bana ndetse n’ababyeyi babo.

Iki kinyamakuru kandi gikomeza kivuga ko abana benshi baba ku mihanda bavanwa mu byaro, bakaza mu migi bagakodesherezwa utwumba dutoya na bo bakabacururiza.

Iri tegeko ritowe kandi nyuma y’amakuru avuga ko abana baba ku mihanda muri iki gihugu bahohoterwa.

Mu 2014, Umuryango mpuzamahanga urengera uburenganzira bwa muntu, Human Rights Watch muri raporo wasohoye, wavuze ko aba bana bahohoterwa n’abapolisi ndetse n’abakozi ba leta.

Human Rights Watch yatangaje ko aba bana bakubitishwa za ndembo n’insinga, bakajanwa muri gereza ndetse bakanakwa ruswa. Aba bana kandi ngo banafatwa ku ngufu.

Icyakoze leta ya Uganda ntiyabyemeye, ahubwo yavuze ko abahohotera aba bana ari uduco tw’abagizi ba nabi.

Ikibazo nasigara nibaza na we wakwibaza nk’umusomyi kiragira kiti:

“Ese aba bana bose baba ku mihanda boherezwa n’abantu ngo babacururize cyangwa hari ababuze aho kuba?”

Twakwibaza na none niba aba bana badakeneye ubufasha bahabwa na leta kuruta gukomanyirizwa ubufasha bwahabwa n’abahisi n’abagenzi.

Leta ya Uganda ivuga ko abana baba ku mihanda bagera ku 15,000 bari hagati yimyaka 7 na 17. Mu 2014, abana bari ku mihanda bari 10,000. Umubare w’abana baba ku mihanda uragenda uzamuka uko imyaka ishira indi igataha.

Izindi wakunda

Bwiza.com
error: Alert: Ntabwo byemewe!!