bwiza.com
Ahabanza » Bidasubirwaho: Rayon Sports yegukanye igikombe cya Shampiyona 2018/2019
Imikino

Bidasubirwaho: Rayon Sports yegukanye igikombe cya Shampiyona 2018/2019

 

Ikipe ya Rayon Sports yegukanye igikombe cya shampiyona y’umupira w’amaguru mu Rwanda ARPL( Azam Rwanda Premier League) 2018/2019. Iki gikombe icyegukanye nyuma yo kunyagira ikipe ya Kirehe ibitego bitatu ku busa( 4:0).

Rayon Sport yagukanye iki gikombe nyuma yo gutsinda ikipe ya Kirehe Fc ibitego 4:0 .Uyu mukino ukaba wari umunsi wa 29 wa shampiyona aho wakiniwe mu karere ka Kirehe I Nyakarambi. Rayon sport itwaye igikombe mu gihe shampiyona isigaje umukino umwe kugira ngo irangire.

Ibi Rayon Sport ibigezeho ibifashijwemo na ba rutahizamu bayo aho Jules Ulimwengu yatsinze ibitego bibiri na Michael Sarpong akaba yatsinze ibitego bibiri. Igice cya mbere cyarangiye Rayon Sport ifite ibitego byatsinzwe na Ulimwengu ndetse na Sarpong.

Igice cya kabiri cyatangiye Rayon Sport isatira cyane ishaka kongera ibitego mu gihe Kirehe FC yo yarwanaga no kwishyura ibitego yari yatsinzwe. Rutahizamu wayo Ulimwengu Jules yaje kubona ikindi gitego mu gihe Sarpong yaje gushyiramo agashinguracumu ku munota wa 90.

Rayon Sport yagiye gukina uyu mukino ibiziko gutsinda uyu mukino bihagije kugira ngo itware igikombe. Rayon Sport yagiye mu kibuga irusha ikipe ya APR FC amanota 4 mu gihe hari hasigaye imikino ibiri gusa. Bivuze ko Gikundiro yasabwaga gutsinda maze igahita yegukana igikombe bidasubirwaho.

Iyi kipe ikomoka I Nyanza, itwaye igikombe ku manota 69 mu gihe hasigaye umukino umwe gusa . Gikundiro itwaye igikombe irusha mukeba wayo amanota 7 mu gihe APR isigaje imikino ibiri. APR Fc ikaba yarigeze kurusha Rayon Sport amanota 12 ku rutonde gusa APR yaje gutakaza imikino bituma bayicaho.

Mu gice cya kabiri cya shampiyona, Rayon Sport yari imaze imikino 18 idatsindwa. Ba rutahizamu bayo Jules Ulimwengu na Michael Sarpong bakaba bombi bamaze gutsinda ibitego 35. Ulimwengu yatsinze 19 mu gihe Sarpong yatsinze 16.

Iki gikombe Rayon Sport itwaye, ni icya cyenda(9) mu mateka yayo. Yari iheruka gutwara igikombe mu mwaka wa 2015/2016 itozwa na Masudi Djuma.

Rayon Sport ikaba izashyikirizwa igikme ku mugaragaro tariki 1 Kanama 2019 ubwo izaba yakiriye Marines FC ku mukino wa nyuma wa shampiyona .Uyu mukino ukaba uzabera kuri stade ya Kigali I Nyamirambo.

Nkurunziza Viateur Bwiza.com

Izindi wakunda

Bwiza.com