bwiza.com
Ahabanza » Nyabihu/ Rambura: Abaturage bavuga ko bakwa ruswa bagiye kwandikisha abana bavutse
Amakuru mu Rwanda

Nyabihu/ Rambura: Abaturage bavuga ko bakwa ruswa bagiye kwandikisha abana bavutse

Abaturage bo mu murenge wa Rambura, mu Karere ka Nyabihu, Intara y’Iburengerazuba, bavuga ko iyo bagiye kwandikisha abana babo bavutse mu gitabo cy’Irangamimerere, bakwa ruswa. Ibi ngo bikaba bibangamira iterambere ryabo.

Bavuga ko iyo batswe ayo mafaranga bagiye kwandikisha abana bituma n’abasigaye mu rugo batabasha kubona ibibatunga, bityo iyo ruswa bakwa, ikabasubiza inyuma mu iterambere.

Uyu agira ati “Nk’iyo bakwatse ibihumbi 10, ayo aba yakagombye kuvamo umwambaro w’umwana, umutungo dufite nk’abaturage ni abana bacu, nk’iyo bayakwatse ngo bakwandikire umwana wavutse, uwasigaye mu rugo ashobora nko gusiba ishuri kubera kubura amakayi cyangwa se ikaramu”.

Mugenzi we ati “Twifuza ko abayobozi bakora ibyo bafatirwa ingamba, nk’abantu bahagarariye abaturage ntibakagombye kubarenganya ahubwo bagombye kubaha serivisi mu gihe babagannye”.

Umuvunyi Mukuru, Murekezi Anastase, ubwo aheruka gusura abaturage bo mu Murenge wa Rambura, yanenze abayobozi baka abaturage amafaranga ya ruswa mu gihe babagannye bashaka kwandikisha abana babo, ko uzafatwa azirengera ingaruka.

Yagize ati “Ntabyo kuvuga ngo umwana ntafite se ngo ntabwo tumwandika, oya! Umwana wese afite uburenganzira bwo kwandikwa, nta ruswa itangwa, kirazira, nta ruswa kugira ngo wandikishe umwana, niyo waba warakerewe nta ruswa,…”.

Yakomeje avuga ko n’ubwo umuntu yaba yarakerewe cyane, ko Leta ariyo igena amande y’ubukererwe, ariko ko nta ruswa umuturage agomba gutanga ngo ahabwe iyo serivisi. Ati “Hejuru y’ariya mande Leta iba yarateganyije, nta ruswa wongeraho”.

Umuturage wakerewe kwandikisha umwana mu bitabo by’Irangamimerere, Leta niyo igena amande y’ubukererwe n’uyatanze agahabwa icyemeza ko yayatanze. Nk’uko bitangazwa na RadioTv Flash, aba baturage bavuga ko iyo batanze ayo mafaranga nta cyo bahabwa kigaragaza ko ari amande baciwe.

Kwandikisha umwana wavutse bikorwa na se w’umwana cyangwa na nyina w’umwana, bombi bataboneka bigakorwa n’uwo bahaye uburenganzira cyangwa n’uwo bafitanye isano ya hafi, umufiteho ububasha bwa kibyeyi.

Iyo abo batabonetse bikorwa n’undi muntu wese wari uhari umwana avuka cyangwa uwamutoraguye, hakagaragazwa icyemezo cy’amavuko cy’umuganga cyangwa cy’ubuyobozi bubifitiye ububasha. Kwandikisha umwana kandi bikorwa hari abatangabuhamya babiri bafite nibura imyaka cumi n’umunani y’amavuko.

Itegeko Nº 32/2016 ryo ku wa 28/08/2016 rigenga abantu n’umuryango risobanura ko umukozi ushinzwe irangamimerere ariwe ufite ububasha bwo kwandika umwana mu bitabo by’irangamimerere.

Umwana ukivuka yandikishwa bitarenze iminsi 30, kimwe no kwandukuza uwapfuye. Uwacikanwe nawe ntagomba kujya mu rukiko ahubwo ajya ku murenge agakemurirwa ikibazo, bakandika umwana we

 

 

Izindi wakunda

Bwiza.com
error: Alert: Ntabwo byemewe!!