bwiza.com
Ahabanza » Burundi: Inkubiri yo guta muri yombi abanyeshuri bashwaratuye mu ifoto ya Nkurunziza irakomeje
Amakuru Politiki

Burundi: Inkubiri yo guta muri yombi abanyeshuri bashwaratuye mu ifoto ya Nkurunziza irakomeje

Abanyeshuri bane batawe muri yombi bashinjwa gushwaratura mu ifoto y’umukuru w’igihugu cy’u Burundi, Pierre Nkurunziza. Ababyeyi babo bavuga ko abana babo barengana bitewe n’uko ngo igitabo kiba cyaraciye mu biganza by’abana benshi.

Aba bana batawe muri yombi ni Dushime Bruce w’imyaka 16, Nduwimana Emmanuel wa 15, Iragena Faustin ufite 16 na Mutumwa Tecie ufite 16, bose hamwe bakaba biga mu mwaka wa Karindwi, mu kigo cy’amashuri abanza cya Kiremba.

Nk’uko SOS Medias/Burundi kibitangaza, ngo bafungiye kuri sitasiyo ya polisi i Buriri. Umuryango utanga ubufasha ku bana mu birebana n’amategeko (FFVSS), watangaje ko aba bana bafashwe ku wa Kane tariki ya 23 Gicurasi, kuri Lyceé Kiremba y’Epfo.

Urwego rw’Iperereza mu Burundi rwabataye muri yombi, ngo rukaba rubashinja gushwaratura mu ifoto ya Perezida Nkurunziza iri mu bitabo bya siyansi by’umwaka wa Karindwi.

Mu gihe hari abavuga ko aba bana barengana bitewe n’uko igitabo kiba cyaraciye mu biganza bya benshi, ngo gufungwa kwabo bishobora kubagiraho ingaruka kuko bari bageze igihe cy’ibizamini bizatangira mu kwezi gutaha, bityo ko byabaviramo gusibira.

Ku wa 26 Werurwe 2019, nibwo Minisitiri w’Ubutabera, Kanyana Aimee Laurentine yatangaje ko abanyeshuri batatu b’abakobwa bari bafungiye konona ifoto y’umukuru w’igihugu, Pierre Nkurunziza, bafunguwe.

Aba banyeshuri batatu b’abakobwa bari mu kigero cy’imyaka 15, 16 na 17 y’amavuko, bari batawe muri yombi babanza gufungirwa muri kasho ya Kirundo nyuma boherezwa muri gereza nkuru ya Ngozi ku wa 21 Werurwe 2019.

 

 

Izindi wakunda

Bwiza.com