bwiza.com
Ahabanza » Ibyaha bitanu bihangayikishije sosiyete nyarwanda- SP. Sano
Amakuru Umuryango

Ibyaha bitanu bihangayikishije sosiyete nyarwanda- SP. Sano

Ubwo habaga umuganda usoza ukwezi , Umuyobozi wa polisi mu Karere ka Nyarugenge, SP Sano Nkeramugaba yasabye abaturage bo mu Murenge wa Kigali gukumira no kwirinda ibyaha bitanu bibangamiye imibereho yabo ya buri munsi.

Sano yashimangiye ko ibyo byaha bibangamiye imibereho myiza y’ abaturage muri Nyarugenge ndetse no mu gihugu ari ubujura, gukubita no gukomeretsa, Ibiyobyabwenge, Gusambanya abana ndetse n’ amakimbirane mu ngo.

Ku bijyanye n’ ubujura, yagize ati” Nubwo bwagabanutse ariko buracya hari kandi uko bwaba bumeze kose butuma iterambere ry’ umuntu ku giti cye ridindira bityo bikanagira ingaruka mbi muri rusange”.

Ku byaha byo gukubita no gukomeretsa , SP Sano yibukije abaturage ko akenshi biterwa n’ubusinzi. Aha yamaganye abaturage bajya bazindukira mu tubari bagatangira kunywa inzoga saa tatu {cyane abagabo…} za mu gitondo bakageza nijoro ngo mu gihe abagore babo baba bari mu mirima.

Sano yahise abaza abaturage aho bakura amafaranga yo kunywera inzoga kuva mu gitondo kugeza nijoro bahereye ku itari ya mbere y’ ukwezi kuzageza ku ya nyuma. Aha, abagore bahise bamusubiza ko abo bantu bafite iyo ngeso {guhora basinda…} ni ukuvuga abagabo ko ari abajura!

SP, Sano yahise yanzura ko abo bantu banywa inzoga buri munsi badakora bashobora gukekwaho ubujura. Yakomeje anagaragaza ko gukoresha ibiyobyabwenge bikomeje kugira ingaruka mbi ku bana babyirutse aho yatanze urugero rw’ abana biga mu mashuri abanza basakwa bagafatnywa imogi mu ma kabutura.

Ati” Umuti wo gukiza aba bana ni ugutanga amakuru ku gihe no kudahishira kuko urwo rumogi rucuruzwa n’ umuturanyi wawe nirwo ruzakwangiriza umwana nta kundi rero ushatse kwikiza ntugomba gushira umurozi!”

SP.Sano yaboneyeho kandi umwanya wo kwamagana abaturage benga ndetse banacuruza inzoga z’ inkorano zagiye zihindurirwa amazina bitewe n’ akarere.

Urugero ni inzoga zikozwe mu matafari, imisemburo y’ amandazi n’ imigati, imiti yo mu misarani na pakimaya zangiza ubuzima bw’ abantu bita BARETETA, MURITURE,MUMANURAJIPO,CUNGUMUNTU n’ ibindi nk’ ibyo.

Ibarurishamibare rigezweho rya polisi rigaragaza ko abana b’ abangavu 634 guturuka ku myaka 18 kumanuka hasi nibo basambanyijwe n’ abagabo bakuru.

SP.Sano ati” Nubwo Polisi y’igihugu ibicishije mu kigo Isange Stop Center ishyiraho gahunda zihamye zirwanya ihohoterwa, abaturage barasabwa kuba ijisho ry’abana babo kuko aba bakobwa ari bo bazahekera u Rwanda mu gihe kiza. Mu gihe bangijwe ari bato ni igihombo kinini.”

Icya gatanu ni cy’ imbonezamubano, kijyanye n’ amakimbirane yo mu ngo, aha bikunzwe kuvugwa ko” zirara zishya bwacya zikazimaza” ariko abandi bakagira bati” zirara zishya bwacya ntizizime”.

Sano yasobanuye ko mu ntangiro mu ngo abashakanye bapfa utuntu duto duto kandi tw’ amafuti ariko ngo iyo bidakumiriwe hakiri kare kandi mu maguru mashya bihindura isura.

Yatanze ingero zitandukanye z’ amakuru agenda yumvikane hirya hino aho abashakanye bicana bikazagira ingaruka mbi ku bana bibarutse aho basigare ari imfubyi cyangwa bakaga iy’ imihanda.

Ibi byaha bitanu bihangayikishije sosiyete nyarwanda byakusanyijwe nyuma y’ ubushakashatsi bwa polisi y’ u Rwanda ikurikije umubare w’ abantu bagejejwe mu bugenzacyaha uko imyaka igenda itambuka.

 

Izindi wakunda

Bwiza.com
error: Alert: Ntabwo byemewe!!