bwiza.com
Amakuru Politiki

Nyagatare: Abatuye mu mirenge ikora ku mupaka wa Uganda bihanangirijwe

Guverineri Mufulukye ari kumwe n’abagize inzego z’umutekano ndetse n’ubuyobozi bw’inzego z’ibanze mu Karere ka Nyagatare basuye abaturage b’Imirenge ya Tabagwe na Rwempasha, ahaherutse kurasirwa kuri uyu wa Gatanu ushize Umunyarwanda n’Umugande bacuruza magendu bashatse kurwanya abashinzwe umutekano, baganira nabo kuri gahunda z’iterambere ndetse n’umutekano by’umwihariko.

Aba baturage bongeye gusabwa kwirinda kujya muri Uganda mu buryo butemewe nyuma y’aho bagenzi babo babiri bashimuswe na CMI muri Uganda bagiye mu munsi mukuru.

Guverineri Fred Mufulyuke yabwiye abaturage ba Tabagwe ko ibikorwa by’iterambere bemerewe na Perezida Paul Kagame birimo kubaka ishuri rigezweho, gusana umuhanda Nyagatare-Tabagwe no kubagezaho amazi meza aturutse ku muyoboro uva Kiyombe, bigomba gukorwa mu mwaka wa 2019-2020

Ati: “Abayobozi dusabwa buri gihe kuba dukwiriye kuba turi kumwe n’abaturage tuganira ku iterambere; ibikorwa byose Nyakubahwa Perezida Paul Kagame yabemereye bigomba kubageraho kandi vuba, amafaranga yarabonetse”.

Yakomeje agira ati: “Ubuyobozi bukora ibishoboka ngo ibyo mukeneye byose bibagereho kandi vuba ariko namwe murasabwa kugira uruhare mu kubungabunga umutekano kugirango ibi bikorwa by’iterambere bibagezwaho hatagira uwabyangiza”.

Guverineri Mufulukye yihanangirije bamwe mu baturage ba Tabagwe bakigaragara mu bikorwa by’ubucuruzi butemewe, abanyura mu nzira zitemewe bari muri ubwo bucuruzi, abasaba gufatanya n’ubuyobozi mu bikorwa byubaka Igihugu, birinda iyo mikorere itanoze kuko idindiza iterambere.

Ati: “Abanyarwanda tubaziho ikinyabupfura, gufatanya n’inzego no gukoraana nabo ariko hari abakigaragaraho imikorere itanoze. Nimwe mukwiriye kuba mufata iya mbere kwamagana bene abo bantu bakiri muri ibyo bibazo, kuko banduza isura yanyu.”

Col Albert Rugambwa, ukuriye ingabo mu turere twa Nyagatare, Gatsibo, Kayonza na Rwamagana

Guverineri Mufulukye yabwiye abaturage ba Tabagwe ko mu Rwanda umutekano uhari, abasaba kwirinda kwambuka bajya muri Uganda mu buryo butemewe kuko abenshi bajyayo bahurirayo n’ihohoterwa kandi ko ubuyobozi butacungira abaturage umutekano bari mu kindi gihugu.

Guverineri Mufulyuke yibukije kandi ko mu myaka yashize mu Rwanda humvikanye ikibazo cy’iterwa rya za grenades kandi ngo byatwaye imbaraga nyinshi ngo iki kibazo kirangizwe. Yavuze ko izi grenades zavaga hanze y’igihugu kuko ngo mu Rwanda zitahakorerwa kandi ngo ntizinjiraga mu gihugu zinyuze ku kibuga cy’indege ahubwo zanyuzwaga mu nzira zitemewe n’amategeko mu kwambuka umupaka.

 

Izindi wakunda

1 Igitekerezo

SAKEGA 27/05/2019 6:51 pm at 6:51 pm

Ariko kurasa abaturage badafite imbunda ntago byemewe, uwarashe Abaturage aba agomba guhanwa.

Subiza

Tanga Igitekerezo

Bwiza.com