bwiza.com
Ahabanza » Minisiteri y’uburezi yatangije ubukangurambaga bugamije kuzamura ireme ry’uburezi mu gihugu
mu Rwanda

Minisiteri y’uburezi yatangije ubukangurambaga bugamije kuzamura ireme ry’uburezi mu gihugu

 

Kuva kuri uyu wa mbere tariki ya 27 Gicurasi 2019, minisiteri y’uburezi( MINEDUC) ifatanije na minisiteri y’ubutegetsi bw’igihugihugu( MINALOC) ndetse n’abandi bafatanyabikorwa bayo batangije ubukangurambaga bugamije guteza imbere ireme ry’uburezi.

Ni ubukangurambaga buzageza tariki ya 7 Kanama 2019. Insanganyamatsiko y’ubu bukangurambaga iragira iti’’ Umwarimu witabira umurimo, ufite imyigishirize inoze ni ipfundo ry’uburezi bufite ireme’’. Ibikorwa by’ubu bukangurambaga bizagera mu mashuri 900 mu turere 30 twose tw’u Rwanda.

Mu itangazo rigenewe abanyamakuru iyi minisiteri yashyize ahagaragara, rivuga ko intumwa z’izi minisiteri n’abafatanyabikorwa bazo zizajya zisura amashuri ,zikore ubugenzuzi mu ishuri ku myigire n’imyigishirize, nyuma yaho habeho kujya inama ku bikwiye kunozwa mu kigo cy’ishuri n’ingamba zafatwa.

Intego y’ubu bukangurambaga ni ukugira inama abayobozi b’ibigo by’amashuri mu kurushaho gukurikirana hafi ibikorwa by’imyigire n’imyigishirize mu ishuri, kugira inama abarimu n’abayobozi b’amashuri kudasiba ndetse no kudakererwa mu kazi kabo, kugira inama abarimu uburyo bwo gutegura amasomo ndetse no kwigisha hakurikijwe integanyanyigisho nshya ishingiye ku bushobozi kandi bagafata ingamba zo gukumira impamvu zose zatuma abana basiba ishuri , basibira cyangwa bata ishuri.

Ni ubukangurambaga buzitabirwa n’abakozi ba minisiteri y’uburezi n’ibigo biyishamikiyeho.Abandi bafatanyabikorwa ba guverineri,ubuyobozi bw’umugi wa Kigali, abayobozi b’inzego z’ibanze, abashinzwe uburezi mu turere ndetse no mu mirenge, ba nyiri amashuri, abahagarariye komite rusange z’ababyeyi mu mashuri, abayobozi b’amashuri, inzego za gisirikare na polisi , inkeragutabara ndetse n’abafashamyumvire n’abandi.

Ubu bukangurambaga buje nyuma y’andi magenzura yagiye akorwa mu mashuri atandukanye mu mwaka ushize wa 2018. Ayo magenzura, yasize hakozwe impinduka zitandukanye zirimo guhagarika abarimu n’ibigo bitujuje ibisabwa kuburyo bishobora kubangamira ireme ry’uburezi.

Nkurunziza Viateur @Bwiza.com

Izindi wakunda

Bwiza.com
error: Alert: Ntabwo byemewe!!