bwiza.com
Amakuru Iyobokamana

Mukore ibitunganiye Imana n’igihugu cyacu- Guv. Mufulukye abwira abayisilamu

Guverineri w’Intara y’Iburasirazuba, Mufulukye Fred yasabye abayisilamu bo muri iyi Ntara guharanira gukora ibyiza bitunganiye Imana n’igihugu cyabo, kuruta uko bakwishora mu bikorwa by’ubutagondwa nk’uko byagaragaye kuri bamwe.

Izi mpanuro Guverineri Mufulukye yazihaye Abayisilamu bo muri iyi Ntara abereye umuyobozi ku mugoroba wo ku Cyumweru tariki ya 26 Gicurasi 2019, ubwo yifatanyaga nabo mu gikorwa cy’ubusabane no gusangira ifutari (Special If’tar) cyabereye ku musigiti mukuru wo mu Karere ka Rwamagana.

Guverineri Mufulukye  avuga ko iby’uko Leta zabanje zakandamizaga abayisiramu, ubu byahindutse, ko Leta y’u Rwanda irangajwe imbere na Perezida wa Repubulika, Paul Kagame, yimakaje ubumwe mu Banyarwanda bose bakaba basangiye igihugu. Abasaba kuba abayisilamu bakunda igihugu.

Yagize ati “Ndabashimira ko mu buzima bwa buri munsi muba mushyize igihugu imbere. Burya mbere yo kuba umukirisitu cyangwa umusilamu habanza kuba umunyarwanda. N’iyo mpamvu icyo gihugu Imana yaduhaye tugomba kucyifuriza amahoro kandi tukakibanamo.”

Yashimiye abayoboke b’iri dini kuba baragize icyo bakosora mu myitwarire yagaragaye mu gihe cyashize ya bamwe muri bo, akaba abasaba kutirara.

Ati “Kuba umusiramu cyangwa umukirisiti hari ikibihatse aricyo gukora ibintu byiza arinabyo Imana izatubaza. Ndabakangurira gukora ibitunganiye Imana n’igihugu cyacu. Ikibazo cy’ubutagondwa cyabayeho mu minsi ishize cyadusize isura mbi ariko turabashimira ko mwabikosoye. Twirinde kwirara ngo twibagirwe kuko ababikoze n’ababibafashijemo baracyahari.”

Imam w’Intara y’Iburasirazuba, Sheikh Kamanzi Djumaine yavuze ko muri uku kwezi kwa Ramadhan 2019, Abayisilamu bo mu turere tw’iyi Ntara y’Iburasirazuba baranzwe no gusiba basabira abasilamu bagenzi babo n’abatari bo.

Avuga ko kuba barahuriye hamwe basangira n’abandi, ari umuco mwiza batojwe n’Intumwa y’Imana Muhammad. Arashima ubufatanye bw’inzego za Leta n’iz’umutekano, ati “Mu minsi ishize twahuye n’ikibazo cy’ubutagondwa ariko turashimira ubuyobozi bw’intara y’iburasirazuba n’inzego z’umutekano ko batubaye hafi, ibibazo bigacyemuka none ubu tukaba dusenyera umugozi umwe twiyubakira igihugu”.

Mu ntara y’Iburasirazuba habarurwa imisigiti 211, abayoboke bayo bose ngo bakaba bari mu gusibo, aho basenga banaharanira kubanira neza abantu bose mu rukundo.

Izindi wakunda

Bwiza.com
error: Alert: Ntabwo byemewe!!