bwiza.com
Ahabanza » Igihe abagenzi bamara ku mirongo ngo kigiye kugabanuka kugeza nibura ku minota 15
Amakuru mu Rwanda

Igihe abagenzi bamara ku mirongo ngo kigiye kugabanuka kugeza nibura ku minota 15

Minisiteri y’ibikorwaremezo itangaza ko hari ibirimo gukorwa kugira ngo hanozwe neza gahunda yo gutwara abagenzi cyane cyane mu Mujyi wa Kigali, mu gihe abagenzi bahora batakamba basaba ko bakemurirwa ikibazo cyo gutinda ku byapa imodoka zihagararaho cyangwa muri gare.

Cyane cyane mu masaha y’igitondo ubwo abantu benshi usanga bazindukiye kujya mu kazi, nibwo usanga hirya no hino mu Mujyi wa Kigali, ku byapa aho imodoka zitwara abagenzi zihagarara hari imirongo miremire, abantu bategereje imodoka. Umuntu ashobora kuhamara n’amasaha, bisobanuye ko aba yarangije gukererwa ku kazi.

Iyi mirongo kandi yongera kuba miremire cyane mu masaha y’umugoroba, nabwo usanga muri gare ya Nyabugogo no mu zindi ziri mu Mujyi wa Kigali abantu batonze imirongo miremire, nabwo hari aho usanga umugenzi ashobora kuhamara isaha imwe, ebyiri cyangwa se eshatu ategereje imodoka.

Abagenzi bakunze kugenda banenga iyi mikorere y’imodoka zitwara abagenzi mu Mujyi wa Kigali, by’umwihariko n’umwe mu bayobozi akaba yarigeze gutangaza ko yakoze isuzuma ajya ku murongo, ahamara amasaha atatu yabuze imodoka imutwara.

Mu kiganiro yagiranye na Tv1, Umunyamabanga wa Leta muri Minisiteri y’ibikorwaremezo, Jean de Dieu Uwihanganye, n’ubwo atavuze igihe iyi gahunda izanozwa, yavuze ko hari ibirimo gukorwa ngo umugenzi ntazajye arenza iminota 15 ku cyapa.

Yagize ati “Guverinoma y’u Rwanda irifuza kunoza gahunda yo gutwara neza abagenzi cyane cyane mu Mujyi wa Kigali, igihe abagenzi bamara ku mirongo kikagabanuka, kugeza nibura ku minota 15. Niyo mpamvu Abafatanyabikorwa basabwa kunoza serivisi abadakora neza bagahanwa”.

Umwe mu bagenzi, utuye i Rutonde, mu Murenge wa Shyorongi, Akarere ka Rulindo, avuga ko ategera imodoka Nyabugogo, itwara abagenzi mu muhanda Gitikinyoni-Nzove-Nyabyondo-Rutonde. Avuga ko byibura iyo atashye nimugoroba ashobora kumara amasaha abiri ku murongo cyangwa akarenga.

Yagize ati “Uyu munsi nageze aho ntegera i Rutonde (Kariyeri) saa 06:20 nahavuye saa 07:35, urumva nari narangije gukererwa. Bara isaha irenga uhagaze mu gitondo, nimugoroba ho n’amasaha abiri arashira duhagaze muri gare, turahagarara bikagera aho umuntu aribwa n’umugongo. Bikosorwe kuko biratubangamiye, harimo igihombo kinshi haba ku giti cyacu kandi n’igihugu kirahomba cyane, si nzi niba abayobozi batabona igihombo kirimo”.

Undi utega imodoka ijya Nyacyonga, aganira na Bwiza.com, yagize ati “Iyo maze amasaha abiri ku murongo imodoka ijya mu ntara nka za Muhanga-Nyanza cyangwa se Rwamagana-Kayonza iba yagezeyo kare, niba se umugenzi akatisha tike mu minota 30 akaba agiye, kuki mu Mujyi wa Kigali bitashoboka? bifite aho bipfira rwose, ariko Perezida wacu umunsi yabihagurukiye abadutera ibi bibazo bazatamazwa”.

N’ubwo abagenzi bakunze kugaragaza ko babangamiwe n’iki gihe bamara ku mirongo, bavuga ko n’imodoka za Taxi & Voiture bisungaga zibasanze mu nzira, ubu nazo zitakemera kubatwara bitewe n’ibihano [bikakaye] ngo abashoferi baba batinya gufatirwa na RURA. Bagasaba ko iyo gahunda yakwihutishwa bagahabwa serivisi zibanogeye.

 

 

 

 

 

Izindi wakunda

Bwiza.com