bwiza.com
Amakuru Politiki

Kigali: Abakora ibyaha by’ubwambuzi bushukana n’ibikoreshejwe ikoranabuhanga baburiwe

Ubuyobozi bw’Umujyi wa Kigali bufatanyije n’izindi nzego zirimo n’iz’ubutabera, batangaje ko nta munsi n’umwe bazihanganira uzafatirwa mu byaha by’ubwambuzi bushukana n’ibikoreshejwe ikoranabuhanga.

Ni ibyatangarijwe abitabiriye ubukangurambaga bwo kuri uyu Kabiri tariki ya 28 Gicurasi 2019, kuri sitade i Nyamirambo, mu Mujyi wa Kigali,  bwo kurwanya ibyaha by’ubwambuzi bushukana n’ibikoreshejwe ikoranabuhanga, bwateguwe n’Urwego rw’Igihugu rw’Ubugenzacyaha RIB ku bufatanye n’abandi bafatanyabikorwa.

Umunyamabanga Mukuru w’Urwego rw’Igihugu rushinzwe ubugenzacyaha ‘Rwanda Investigation Bureau’ (RIB), Ruhunga Jeannot, yasobanuye impamvu hahiswemo kuganira ku kurwanya icyaha cyo kwihesha ikintu cy’undi hakoreshejwe uburiganya n’ibyaha bikoreshwa ikoranabuhanga. Yagize ati “Impamvu yo guhuza ibi byaha byombi ni uko akenshi ikoranabuhanga rikunze kwifashishwa mu cyaha cy’ubwambuzi”.

Yakomeje asobanura ibi byaha, ati “Ibyaha bikoreshejwe ikoranabuhanga ni ibyaha bikorwa hifashishijwe ikoranabuhanga haba gukoresha mudasobwa, telefoni, internet cyangwa ubundi buryo bwose bw’itumanaho”.

Umuyobozi wa RIB, Ruhunga Jeannot

Ruhunga avuga ko ingaruka z’ubwambuzi bushukana n’ububeshyi n’ibyaha bikoreshejwe ikoranabuhanga, zirimo kwimakaza akarengane, kudindiza amajyambere, guteza umutekano muke, bituma abaturage bamburwa ibyabo, n’izindi nyinshi.

Umuyobozi w’Umujyi wa Kigali, Rwakazina M. Chantal, avuga ko nk’ubuyobozi bw’uyu Mujyi, kugera ku Mudugudu, bafatanyije n’izindi nzego, batazahwema guhangana n’abashaka kugerageza ibi byaha.

Ati “Murabizi ko abagizi ba nabi mu Mijyi bakoresha nabi ubumenyi bafite mu ikoranabuhanga kugira ngo bashuke abantu bagamije kubambura ibyabo, tuzakomeza kubirwanya kuva ku rwego rw’Akarere kugeza ku rwego rw’Umudugudu.”

Ubu bukangurambaga bwatangijwe na RIB, bwakorewe mu Ntara zose z’Igihugu kuva tariki ya 30 Mata 2019, bufite insanganyamatsiko igira iti “Sobanukirwa ibyaha ubyirinde ubirinde n’abandi”.

Umuyobozi w’Umujyi wa Kigali, Rwakazina M.Chantal

 

Izindi wakunda

Bwiza.com