bwiza.com
Ahabanza » Uganda: Umucamanza yategetse ifatwa rya Maj. Gen. Kyaligonza ukurikiranweho guhohotera umupolisikazi
Amakuru Politiki

Uganda: Umucamanza yategetse ifatwa rya Maj. Gen. Kyaligonza ukurikiranweho guhohotera umupolisikazi

Umucamanza Juliet Hantanga wo mu Rukiko rwa Mukono yategetse itabwa muri yombi rya Ambasaderi wa Uganda mu Burundi, Maj. Gen. (Rtd) Matayo Kyaligonza n’abarinzi be ku byaha byo gukubita no kwitambika umupolisi uri mu kazi ke.

Umucamanza yategetse ko Maj. Gen. Kyaligonza, abarinzi be babiri, Cpl Peter Busindiche na Pte John Okurut, batabwa muri yombi bakazajyanwa mu rukiko ku itariki 10 Kamena bakisobanura ku byo bashinjwa nyuma yo kwanga kwitaba urukiko inshuro nyinshi.

Abunganizi ba Kyaligonza, David Balondemu, Evans Ochieng na Caleb Alaka, bavuga ko umukiriya wabo arimo kuburanishwa mu nkiko ebyiri (Urwa Mukono n’urukiko rwa gisirikare) icya rimwe, akaba atarabashije kwitaba amaburanisha yose ariko urukiko rwabitesheje agaciro.

Gen Kyaligonza n’abarinzi be bashinjwa kuba barakubise umupolisikazi Esther Namaganda, ukora mu ishami ryo mu muhanda, kuwa 24 Gashyantare muri uyu mwaka ubwo bari ahitwa Seeta, mu Karere ka Mukono.

Umunyamategeko Alaka akaba yabwiye urukiko ko  abaregwa bose ari ab’igisirikare kandi ari cyo gifite inshingano zo kubahana nk’uko iyi nkuru dukesha Daily Monitor ikomeza ivuga.

Yavuze ko niba aba bantu bashobora kwemezwa ibyaha ndetse bagahanwa n’inkiko zombie, basaba uru rukiko rwa gisivili kurekeraho gukurikirana uru rubanza kubera ko bari gukurikiranwa n’Urukiko rwa Gisirikare. Ati: “Niyo mpamvu bose batagaragaye muri uru rukiko.”

Mugenzi we Ochieng we yavuze ko nta mpamvu urukiko rwategeka itabwa muri yombi ry’aba bantu kuko bamwe, Cpl Busindiche na Pte Okurut, basanzwe bafunze.

Ariko, Umushinjacyaha mukuru wa leta, Jonathan Muwaganya, yashimangiye ko urukiko rwategetse itabwa muri yombi ry’abaregwa rutesha agaciro ibivugwa n’ababunganira ku kubura mu rukiko kwabo.

Uyu yanabwiye urukiko ko izina rya Gen. Kyaligonza ryo ritari no ku rupapuro rw’ikirego ruri mu Rukiko Rukuru rwa Gisirikare kubera ko ngo uyu ari umusirikare wagiye mu zabukuru. Yavuze ko kuba yaranze kwitaba urukiko bigaragaza agasuzuguro ku rukiko ari yo mpamvu yasabye uruhushya rwo kumuta muri yombi.

Nyuma y’icyemezo cy’urukiko, Alaka akaba yabwiye itangazamakuru ko bagiye kujuririra iki cyemezo mu Rukiko Rukuru ngo ruhagarike impapuro zo guta muri yombi abakiriya babo.

Umupolisikazi Namaganda wahohotewe n’abo basirikare nawe ngo yari mu rukiko n’umugabo we, Alphonse Musoni nawe w’umupolisi.

 

 

Izindi wakunda

Bwiza.com
error: Alert: Ntabwo byemewe!!