bwiza.com
Amakuru Politiki

Umunyamujyi muzima ni ukoresha amaboko n’ubwenge- Min. Busingye

Minisitiri w’Ubutabera akaba n’Intumwa Nkuru ya Leta y’u Rwanda, Busingye Johnston avuga ko uwiyita umunyamujyi kubera ibikorwa by’amanyanga yibeshya, ahubwo ko umunyamujyi muzima ari ukoresha imbaraga afite kandi akanatekereza kure.

Yabitangaje kuri uyu wa 28 Gicurasi 2018, i Kigali, mu muhango w’ubukangurambaga ku byaha bikoreshejwe ikoranabuhanga n’ibyaha by’inzaduka biba bigamije kwiba abantu. Yavuze ko ibi byaha bidindiza umuvuduko igihugu cyari kirimo mu iterambere, bityo agasaba buri wese kubirwanya.

Ati “Kurwanya ibyaha muri rusange n’icyaha cy’ubwambuzi bushukana n’ububeshyi n’ibyaha bikoreshejwe ikoranabuhanga mu Rwanda bikwiye kuba ibya buri wese, by’umwihariko abayobozi n’abavuga rikumvikana kuko igihugu kirimo ubujura gahunda zose z’iterambere ziradindira.”

Avuga ko ibi byaha bigira ingaruka nyinshi ku gihugu, ubukungu, ku buzima bw’abantu nibyo batunze, bishora abantu mu madeni. Aho ibi byaha byageze ngo nta mushoramari uhifuza kuko nta nyungu n’umutekano w’amafaranga ye aba ahabona.

Min Busingye avuga ko umuntu wiyita umunyamujyi kubera amanyaga akora, aba yibeshya cyane. Ati “Umuntu wese wiyita umunyamujyi kubera imitwe, amayeri, ibinyoma, uburiganya bituma atwara utw’abandi nta munyamujyi umurimo. Ni umugizi wa nabi kandi iminsi ye atarafatwa irabaze.”

Arasobanura ukwiye kwitwa iri zina. Ati “Umunyamujyi muzima ni ufite ubwenge bwo kuba mu Mujyi, ukoresha amaboko n’ubwenge bye gufasha abantu benshi baba mu mijyi, bakamuhemba akabona amafaranga amutunga atagombye kwiba.”

Avuga kandi ko nk’igihugu cy’u Rwanda kirimo kubakwa ku mutekano usesuye,  buri agomba kugengwa n’amategeko, uyarenzeho kandi akabibuzwa na none hakurikijwe amategeko, bityo akaba asaba inkunga ya buri wese ku bijyanye cyane cyane no guhanahana amakuru kuri ibi byaha ndetse n’ibindi.

Ingingo ya 318 y’igitabo cy’amategeko ahana y’u Rwanda ivuga ko umuntu wese, abigiriye kwambura ikintu icyo ari cyo cyose cy’undi, agatuma bakimuha ari uko akoresheje amayeri y’ubwambuzi, wiyitirira amazina atari yo cyangwa imirimo adafitiye ububasha cyangwa agira ngo yizeze icyiza cyangwa atinyishe ko hari ikizaba kibi maze akambura undi imari ye yose cyangwa igice cyayo, ahanishwa igifungo kuva ku myaka itatu (3) kugeza ku myaka itanu (5) n’ihazabu y’amafaranga y’u Rwanda kuva kuri miliyoni eshatu (3.000.000) kugeza kuri miliyoni eshanu (5.000.000)

Izindi wakunda

Bwiza.com