bwiza.com
Ahabanza » Abanyarwanda babiri birukanwe ku butaka bwa Uganda nyuma y’iyicarubozo
Amakuru mashya

Abanyarwanda babiri birukanwe ku butaka bwa Uganda nyuma y’iyicarubozo

Emmanule Mibungo (ibumoso) na Paul Muhirwa

Abanyarwanda babiri Paul Muhirwa w’imyaka 36 na Emmanuel Mibungo w’imyaka 32 birukanwe ku butaka bwa Uganda nyuma yo gukorerwa iyicarubozo nk’uko babivuga.

Aba bagabo banyujijwe ku mupaka wa Kagitumba kandi ko bamaze igihe baba muri iki gihugu n’imiryango yabo.

Muhirwa ubwo yageraga i Kigali yavuze ko amaze imyaka 10 aba muri Uganda kandi ko ajya gutabwa muri yombi ntacyo yari yakoze uretse kubwiriza ijambo ry’Imana.

Avuga ko itabwa muri yombi rye ryamutunguye, ati “ Nagiye muri Uganda mu 2009. Nabaye pasiteri mu rusengero rwo mu Karere ka Kanungu. Nyuma naje gushinga urwanjye rusengero rwitwa ‘River of Life Ministry, mba muri Uganda n’umuryango wanjye kandi kubwiriza ubutumwa bwiza ni byo nakoraga gusa.”

Yakomeje agira ati “ Umunsi umwe muri Mata 2019,  nasuye inshuti yanjye nibwo umusirikare yanyegereye ambaza uwo ndi we n’uburyo nageze muri Uganda. Ntiyategereje no kumva icyo nsubiza, yahise anshyira mu mdoka yari yazanye.”

Muhirwa avuga ko yari yaguye mu kantu gusa ngo ubwo yagezwaga kuri sitasiyo ya polisi yitwa Mburabuzi, yabwiwe ko ashinjwa kuba intasi.

Yabwiye The New Times ko  kuva ubwo yahaswe ibibazo ari nako akorerwa iyicarubozo abwirwa ko natemera ko ari intasi y’u Rwanda, amagara ye ari mu byago.

Ati “ Ku munsi wa kane nibwo umupolisi yansanze muri gereza ambaza  niba ndi Umunyarwanda mubwira ko ari byo. Yambajije icyo Kagame[Perezida yantumye gukora, ndaceceka ahita asaba ko banjyanira CMI i Kampala.”

Muhirwa avuga ko yabayeho nabi akigezwa i Kampala. Ati “ Njye nabo nasanzeyo twabagaho nabi, twabaga ahantu hataba urumuri kandi hakonje cyane. Niho twaryamaga kandi rimwe na rimwe abasirikare bamenagamo amazi kugira ngo tudasinzira kandi hakomeze kuba ubutita.”

Avuga ko yatangiye kubabara umubiri wose by’umwihariko amavi, umugongo n’igifu. Yemezako hari abandi Banyarwanda bari bafunganwe na we barimo abitwa Dan Karangwa, Pierre, Nelson, Asiimwe n’abandi.

Mibungo na we avuga ko yatawe muri yombi mu kwezi gushize akajyanwa ahitwa Mbuya aho yakorewe iyicarubozo.

Ati “ Nagezeyo banshinja kuba maneko, barankubise cyane. Bantegetse kwikorera ibiremereye n’irindi yicarubozo.”

Mibungo avuga ko abakozi b’Iperereza rya Gisirikare (CMI) babasabaga kujya muri RNC ya Kayumba Nyamwasa kugira ngo bareke gukorerwa iyicarubozo.

Uyu mugabo yasize umugore n’abana be babiri muri Uganda, avuga ko ahangayikishijwe n’uburyo azongera guhura nabo.

Leta y’u Rwanda ivuga ko Abanyarwanda basaga 800 bamaze kwirukanwa ku butaka bwa Uganda mu gihe abagera kuri 200 bakiri muri gereza zo muri iki gihugu.

 

 

Izindi wakunda

Bwiza.com
error: Alert: Ntabwo byemewe!!