bwiza.com
Amakuru Politiki

Kigali/ Ruhango I: Kuva aho Perezida asuriye Mont Kigali umutekano warushijeho kunoga

Abaturage batuye kuri Mont Kigali biganjemo abo mu Mudugudu wa Ruhango I batangaje ko kuva Perezida Paul Kagame yasura aka gace mu buryo butunguranye muri Mutarama 2019, katangiye kurangwamo umutekano cyane.

Bamwe mu baturage batuye mu Mudugudu wa Ruhango  aho bakunze kwita ku Cyitabi bavuze ko hari ikibazo gikomeye cy’ umutekano gishingiye ahanini ku bujura, ubusinzi ndetse n’ urugomo.

Mu kiganiro na Bwiza.com , Vestine Nyiramwiza usanzwe ukora ubucuruzi buciriritse kandi butunze abana be barindiwi, yagize ati” Navaga hano ku isoko ariko nkahorana ubwoba bwo gutambika njya mu rugo ntinya ko banyambura cyangwa bakangirira nabi, ariko ubu kuva aho polisi itwegereye ibintu bimeze neza”.

Bashima Perezida Kagame wabegereje sitasiyo ya Polisi

Mugiraneza Alphonse utuye muri Ruhango ya nawe yunze mu rya mugenzi we, aho yerekana itandukaniro ry’ umutekano mbere na nyuma y’ aho Perezida Kagame abasuriye.

Yagize ati” Yego ntabwo twavuga ko byari byaracitse ariko tuzi neza ko hari abantu bajyaga bamburwa hano no kumanywa y’ ihangu, muri abo harimo n’ abamburirwaga hirya gato muri Meraneza ariko ubu si uko bimeze”.

Umukuru w’ Umudugudu wa Ruhango, Dieudonne Kanyarutoki yatangaje ko kuva aho Perezida wa Repubulika, Paul Kagame agiriye uruzinduko kuri Mont Kigali ibintu byarushijeho gusobanuka.

Ati” Ikibazo cy’ umutekano cyahise gikemuka mu maguru mashya dore ko muri uyu Mudugudu hahiswe hazanwa icyicaro cya polisi y’ igihugu bituma abaturage barushaho kwisanzura no kugira umudendezo”.

Yanashimangiye ko uku gusura Mont Kigali kwa Perezida Kagame byagaragaje agaciro igihugu giha abaturage  kuko byahise bikurikirwa n’ ishyirwa mu bikorwa ry’ umushinga munini wo gutangira gukora umuhanda uzahuza Karama na Nyamirambo.

Ibikorwa byo kubaka umuhanda Karama-Nyamirambo birarimbanyije

Ku ruhande rumwe, Kanyarutoki yashimangiye ku buryo Leta y’ u Rwanda igaragaza ubushake bwo guharanira iterambere  ryihuse ry’ abaturage.

Aha yavuze ko abaturage ayobora bagizwe n’ ingo zisaga 500, bakaba baregerejwe amazi meza ku rugero rw’ ibice 75% , amashanyarazi 100% n’ ibindi bikorwaremezo birimo n’ imihanda igende ikorwa ku bufatanye bw’ ingabo z’ igihugu ndetse na polisi.

Abaturage bashima Leta y’Ubumwe ikomeje kubagezaho iterambere

Ku rundi ruhande, Kanyarutoki yatangaje ko  kugeza magingo aya, bitewe n’ ubushake bwiza bwa politiki bw’ inzego z’ ubuyobozi ndetse n’ iz’ umutekano, ibyaha byari byiganjemo ubujura no kwabura, ubusinzi, urugomo n’ amakimbirane yo mu ngo bigenda bikumirwa ndetse binagabanuka mu buryo bugaragara.

Umudugudu wa Ruhango , nk’ amwe mu marembo y’ Umujyi wa Kigali uherereye mu Kagali ka Ruliba , Umurenge wa Kigali, Akare ka Nyarugenge gahana imbibi ka Ryamakomali, Ruhango II mu Kagali ka Kigali, Muhabura yo muri Kivugiza ndetse n’ ahangana ku ishyamba rya Meraneza gahana imbibi na Ruhuha mu Kagali ka Mwendo.

Abaturage batuye muri Ruhango bagaragaraho kwinjira mu mibereho y’ abanyamujyi batunzwe n’imirimo y’  ubuhinzi n’ ubworozi ariko ikindi gice kinini gikora imirimo y’ ubucuruzi buciriritse hirya no hino mu mujyi wa Kigali.

Aka gace ka Kitabi karangwaga n’ibikorwa by’urugomo, ubujura n’ ubusinzi ariko ubu karatekanye

Izindi wakunda

Bwiza.com