bwiza.com
Ahabanza » Minisiteri y’Ubuzima itangaza ko ntawe ukwiye gusiba ishuri cyangwa akazi kubera ko yagiye i mugongo
Ubuzima

Minisiteri y’Ubuzima itangaza ko ntawe ukwiye gusiba ishuri cyangwa akazi kubera ko yagiye i mugongo

 

Kuri uyu wa gatatu tariki ya 29 Gicurasi 2019 hizihijwe umunsi mpuzamahanga wahariwe kwita ku isuku mu gihe umugore yagiye I mugongo (mu mihango). Uyu munsi ukaba wizihijwe ku rwego rw’igihugu mu karere ka Ngoma mu burasirazuba bw’u Rwanda.

Muri 2015 nibwo imiryango mpuzamahanga igera kuri 150 yishyize hamwe itangiza ubukangurambaga bugamije kwimakaza isuku y’umwana w’umukobwa igihe ari mu mihango. Uyu munsi ukaba ugamije gutanga urubuga rwo kuganiriraho amakuru y’ubuzima bw’imyororokere.

Bisobanurwa ko kujya mu mihango ari ubuzima busanzwe ku buryo umukobwa atagomba gusiba ishuri cyangwa akazi.Buri mwaka umukobwa ashobora gusiba ishuri cyangwa akazi iminsi igera kuri 50 kubera kujya mu mihango by’umwihariko abo mu cyaro bahura n’imbogamizi yo kutabona ibikoresho bihagije by’isuku bituma bajya mu bandi dore ko bamwe bibatera isoni n’ipfunwe.

Minisiteri y’ubuzima n’abandi bafatanyabikorwa basobanura ko itangwa ry’ayo makuru by’umwihariko mu bangavu n’ingimbi byagira uruhare mu gukumira inda zitifuzwa. Iki kibazo cy’inda zitifuzwa, akaba ari ikibazo gihangayikishije umuryango nyarwanda muri iki gihe.

Mu kwizihiza uyu munsi ,hatashywe icyumba cy’umukobwa cy’ikitegererezo cy’ubatswe ku ishuri ribanza rya Kigarama mu karere ka Ngoma.

Nkurunziza Viateur @Bwiza.com

Izindi wakunda

Bwiza.com
error: Alert: Ntabwo byemewe!!