bwiza.com
Ahabanza » Nyamasheke: Imibiri isaga ibihumbi 15 y’Abatutsi bazize Jenoside yashyinguwe mu cyubahiro
Amakuru Politiki

Nyamasheke: Imibiri isaga ibihumbi 15 y’Abatutsi bazize Jenoside yashyinguwe mu cyubahiro

Mu rwibutso rwa Jenoside rwa Gashirabwoba, mu Murenge wa Bushenge, Akarere ka Nyamasheke, kuri uyu wa 26 Gicurasi 2019, nibwo rwashyinguwemo  imibiri 15.629 y’Abatutsi bazize Jenoside.

Muri iyi mibiri yashinguwe mu cyubahiro harimo 13577 yari isanzwe ishyinguye mu rwibutso rushaje rwa Gashirabwoba rutari rwujuje ibisabwa, imibiri 675 yakuwe mu rwibutso rwa Jenoside rwa Muyange mu murenge wa Nyabitekeri, imibiri 268 yakuwe mu rwa Kidashira mu murenge wa Bushenge,indi 70 yakuwe hirya no hino aho yari ishyinguye mu mva zisanzwe hatari mu nzibutso n’indi 1039 yaturutse mu Murenge wa Giheke mu karere ka Rusizi irimo 1038 yari ishyinguye mu rwibutso rwa Jenoside rwa Giheke n’undi umwe wabonywe abaturage bahinga.

Mu kiganiro cyatanzwe n’umunyamabanga nshingwabikorwa wa komisiyo y’igihugu yo kurwanya Jenoside (CNLG),Dr Jean Damascène Bizimana yashimiye akarere ka Nyamasheke kuri uru rwibutso rwa Jenoside kujuje rwujuje ibisabwa byose n’imbaraga kashyizemo.

Ku byerekeranye na bamwe mu barokotse Jenoside yakorewe abatutsi batarumva neza gahunda yo guhuza inzibutso,harimo n’abavuga ko aho imibiri y’ababo yimurirwa haba ari kure yabo ku buryo kuhagera bishobora kubagora ugereranije n’aho iba yari iri, yabamaze impungenge.

Yagize ati “Nta mpungenge bakwiye kugira kuko mu kuzihuza hitabwa ku bintu bitandukanye birimo urugendo abantu bakora no kuba urwibutso rwubatse ahantu hisanzuye hashobora kwibukirwa, rushobora kuba rwajyamo amateka n’ibindi,ibyo byose byitabwaho, bikaba biganirwaho mbere y’uko yimurwa kandi nta cyemezo gifatwa hatabayeho kumvikana no kuganira n’inzego zitandukanye.’’

Yagarutse kandi ku mateka ashaririye Abatutsi banyuzemo na mbere y’uko bakorerwa Jenoside mu 1994, arimo kwimwa amashuri, kudahabwa agaciro nk’ak’abandi banyarwanda n’ibindi, anagaruka by’umwihariko ku bari abayobozi bagera kuri 25 bo mu cyari ari perefegitura ya Cyangugu bijanditse
muri Jenoside ,barimo ababurugumesitiri,abasuperefe,abayobozi mu ngabo ,abacuruzi bakomeye,abakuru b’imirimo n’izindi nterahamwe kabombo,bose bari barangajwe imbere n’uwari perefe w’iyo perefagitura, Emmanuel Bagambiki ngo watangiye ubugome bwe mu 1986 ari perefe wa Gitarama.

Avuga ko yabukomereje mu kwica Abatutsi mu Bugesera mu 1992 ubwo yari perefe w’iyari perefegitura ya Kigali ngali, aho guhanwa ahembwa kuza kurangiza ab’iwabo i Cyangugu mu 1994, ababazwa n’uko ubu yagizwe umwere kimwe na bamwe mu bandi banyacyangugu,ariko ngo ubwo bwere bwabo Leta y’uRwanda ntiyigeze ibwemera.

Uhagarariye Ibuka muri aka karere Bagirishya JMV yagarutse ku bagize uruhare muri Jenoside yakorewe abatutsi binangiye gusaba imbabazi bakaba batanerekana aho bajugunye imibiri y’abatutsi bishe itaraboneka ngo ishyingurwe mu cyubahiro ahubwo bamwe bakaba bagenda bihishahisha hirya no hino,asaba ko aba bihishahisha bari mu gihugu bashakishwa bakaryozwa
ubugome bakoze.

Visi perezida wa sena,Hon.Harelimana Fatu wari umushyitsi mukuru yashimiye abarokotse Jenoside yakorewe abatutsi umutima wo kwihangana no kwiyubaka ukomeje kubaranga,abasaba abaturage bose kwima amatwi abahakana bakanapfobya Jenoside bari hirya no hino ku isi,anabasaba kwigisha
abana babo urukundo bakanababwiza ukuri ku mateka ya Jenoside yakorewe abatutsi.

Uru rwibutso rushya rwuzuye rutwaye 518.140.000 by’amanyarwanda, rugizwe n’ibice 3 birimo inzu y’urwibutso nyirizina irimo igice ndangamateka n’ibindi bice,igice gishyinguyemo imibiri n’igice cy’ubusitani bwibukirwamo,umuyobozi w’aka karere Kamari Aimé Fabien akavuga ko ruzitabwaho ku buryo bwose.

 

Izindi wakunda

Bwiza.com
error: Alert: Ntabwo byemewe!!