bwiza.com
Amakuru Politiki

U Rwanda rwasabye Uganda kurubwira aho Abanyarwanda 2 baherutse gufatwa bafungiye

Guverinoma y’u Rwanda yandikiye Minisiteri y’Ububanyi n’Amahanga ya Uganda isaba kumenya amakuru y’Abanyarwanda babiri baherutse gufatirwa mu Karere ka Rukiga, mu mpera z’icyumweru gishize, ngo guverinoma y’igihugu cyabo ibahe ubufasha buvuye muri ambasade.

Abanyarwanda babiri batawe muri yombi ni; Habiyaremye Eric na Pierre Samvura, bafashwe n’abashinzwe umutekano ba Uganda bakuwe ku rusengero ruri Kamwezi bashinjwa kwinjira mu gihugu mu buryo bunyuranyije n’amategeko ngo bagiye mu butumwa bw’ubutasi.

Avugana na Daily Monitor dukesha iyi nkuru kuri uyu wa Kabiri, Ambasaderi w’u Rwanda I Kampala, Frank Mugambage yagize ati: “Twandikiye minisiteri, turashaka kumenya aho abo babiri bafungiye kugirango tubahe ubufasha bwa ambasade,”

Iki kinyamakuru kivuga ko kitabashije guhita kimenya niba iyi baruwa yageze ku bo yagenewe kuko cyagerageje kuvugisha minisitiri ushinzwe ubutwererane mu karere, Henry Oryem Okello ariko ntiyitabe telephone.

Ku ruhande rw’igisirikare cya Uganda rwo, umuvugizi wacyo, Brig. Richard Karemire yanze guhishura aho abo Banyarwanda bafungiye ariko avuga ko bazitabwaho.

Ni mu gihe andi makuru yizewe agera kuri iki kinyamakuru yemeza ko aba Banyarwanda bari bategerejwe I Kampala ku mugoroba wo kuri uyu wa Kabiri ngo bahatwe ibibazo.

Kuri uyu wa Mbere ushize ubwo Uganda yashyikirizaga u Rwanda umurambo w’Umunyarwanda Pierre Nkerenke, uherutse kurasirwa hafi y’umupaka ubwo yafatwaga ashaka kwinjiza magendu mu gihugu agashaka kurwanya abashinzwe umutekano, Umuyobozi w’Akarere ka Nyagatare, Claudian Mushabe, yasabye abayobozi ba Uganda kurekura n’Abanyarwanda babiri bari bafatiwe muri Uganda.

 

 

Izindi wakunda

Bwiza.com