bwiza.com
Ahabanza » Uganda: Haravugwa ifatwa ry’Umusirikare wa UPDF ufite ipeti rya Colonel ushinjwa kuba intasi y’u Rwanda
Amakuru Politiki

Uganda: Haravugwa ifatwa ry’Umusirikare wa UPDF ufite ipeti rya Colonel ushinjwa kuba intasi y’u Rwanda

Igisirikare cya Uganda kiravugwaho  guta muri yombi umwe muri ba ofisiye bakuru bacyo ngo afashe mu iperereza ku birego bimushinja kuba intasi y’u Rwanda. Amakuru aturuka mu nzego zo hejuru aravuga ko Urwego rushinzwe Iperereza mu gisirikare cya Uganda (CMI) rwafashe Col Paul Muwonge kuwa gatatu ushize.

Mbere y’iryo tabwa muri yombi rye rivugwa, Col Muwonge yari akuriye ishami rishinzwe iperereza mu Gisirikare cya Uganda kirwanira ku butaka, aho ngo yabashaga kubona amakuru yingenzi kandi y’ibanga yasangirwaga na division zigera muri eshanu zirwanira ku butaka amakuru agashyikirizwa abafata ibyemezo mu buyobozi bw’ingabo bwo hejuru.

Iyi nkuru dukesha Daily Monitor irakomeza ivuga ko ibi byose ari ibivugwa kuri ofisiye kandi Atari yabishinjwa ku mugaragaro kubw’ibyo akaba akiri umwere kugeza igihe azashinjirwa cyangwa agahamwa n’icyaha.

Amakuru yakomeje agera kuri daily Monitor mu ijoro ryakeye akaba avuga ko nyuma y’itabwa muri yombi rye kuwa 22 Gicurasi, Col Paul Muwonge yafungiwe mu Kigo cya Gisirikare cya Makindye, muri Kampala, arinzwe bikomeye.

Col David Gonyi ngo akaba ari we wahise umusimbura ngo azibe icyuho muri uwo mwanya w’ingenzi mu gisirikare yakoragamo. Hagati aho kandi, ngo ntiharamenyekana niba Col Muwonge abasha kuvugana n’umuryango we cyangwa umunyamategeko kuva yafungwa.

Iyi nkuru iravuga ko hagiye havugwa byinshi kuri Col Muwonge haba ku kumenya aho yaba afungiye n’icyaha yaba yarakoze. Umwe mu bakozi ba guverinoma avuga ko agifunze mu gihe hari amakuru ava mu nzego z’umutekano yahakanye ko yatawe muri yombi mbere yo kwemera ko arimo gukorwaho iperereza ariko ridafite aho rihuriye no kunekera igihugu icyo ari cyo cyose cy’igituranyi.

Naho umuvugizi wa UPDF, Brig. Richard Karemire, yaraye abwiye iki kinyamakuru mu ijoro ryo kuri uyu wa kabiri, itariki 28 Gicurasi, ko Col. Muwonge adafunze, ariko ko ari ukuri arimo gukorwaho iperereza ku myitwarire ye yaba inyuranyije n’amahame ya gisirikare.

 

Izindi wakunda

Bwiza.com