bwiza.com
Amakuru Politiki

Akayabo kazakoreshwa mu ishyingurwa rya Etienne Tshisekedi ntikavugwaho kimwe

Mu gihe hasigaye amasaha macye kugira ngo umurambo wa Etienne Tshisekedi ugere i Kinshasa haravugwa umwuka mubi biturutse ku kayabo k’ amadorari agiye gukoreshwa mu ishyingurwa rye.

Imvano ya byose ni urwandiko rwashyizweho umukono n’ umuyobozi mukuru  w’ ibiro bya Perezida wa Repubulika rwemeza ko imyubakire y’ imva ye yo nyine izatwara miliyoni ebyiri n’ igice z’ amadorari y’ amanyamerika.

Abayobozi babishinzwe banze kugira icyo batangaza ku mugaragaro, nubwo mu Biro bya Perezida wa Congo-Kinshasa, Felix Tshisekedi bivugwa bucece, nk’ uko tubikesha RFI.

Umwe mu bavugizi b’ istinda rishinzwe gutegura uburyo Etienne Tshisekedi azashyingurwa, Lenga Moss yatangaje ko agaciro k’ amafaranga azakoreshwa angana nayakoreshejwe mu ishyingurwa rya nyakwigendera Perezida Laurent Désiré Kabila.

Lenga Moss yagize ati” Hari abavuga ko tuzakoresha hagati ya miliyoni ebyiri n’ esheshatu z’ amadorari ariko icyangombwa n’ icyubahiro tugiye guha umuntu nka Etienne Tshisekedi kuko ni umuntu udasanzwe mu mateka y’ iki gihugu”.

Lenga ashaka kwerekana ko  Etienne Tshisekedi akwiriye gushyingurwana icyubahiro kidasanzwe yashimangiye ko niwe wabaye umuyobozi mukuru wa mbere w’ ishuri ry’ amategeko n’ ubuyobozi muri Congo-Kinshasa ndetse anaba Minisitiri w’ Intebe.

Ati” Nubwo abantu batarambyumva neza, Uyu mukambwe wanditse amateka muri politiki akwiriye guherekezwa neza cyane kandi abantu bagatandukanya igiciro cy’ amafaranga n’ agaciro ke”.

Hari amakuru yacicikanye ku mbuga nkoranyambaga yavugaga ko gucisha umuhango wo gushyingura mu cyubahiro Etienne Tshisekedi kuri Televiziyo  byonyine bizatwara amadorari y’ amanyamerika ibihumbi 52.

Imwe mu muryango ya sosiyete sivile ikorera muri Congo-Kinshas nka LUCHA iratangaza ko itababazwa no kuba Etienne Tshisekedi  waharaniriye Demokrasi atashyingurwa mu cyubahiro kimukwiriye ahubwo basanga amafaranga bizatwara ari menshi ndetse hari n’ abashobora kubyungikiramo.

Bagize bati” Igihugu kirakennye cyane kandi Mzee Tshisekedi yakundaga kuvuga ati  « Le peuple d’abord », bishatse kuvuga mbere na mbere abantu”..

Sosiyete sivile isanga uburyo bwiza bwo kubahiriza Etienne Tshisekedi  ari ukwigisha abaturage indangagaciro ze ndetse bakanubaka ibikorwa remezo bizamwitirirwa.

Gaston Rwaka/ Bwiza.com

 

Izindi wakunda

Bwiza.com