bwiza.com
Amakuru Politiki

Rwamagana: Abajyanama b’ubuzima barataka gusiragizwa bishyuza amafaranga yabo

Abajyanama b’ubuzima mu Karere ka Rwamagana barinubira gusiragizwa bishyuza amafaranga bakoreye mu gikorwa cyo gutera imiti yica imibu.

Abajyanama b’ubuzima bavuga ko bahuguwe iminsi 5 mbere yo gutera umuti wica imibu mu mirenge yose ariko ntibahabwe amafaranga y’agahimbazamusyi bemerewe muri iyo minsi .

Nyuma y’amahugurwa bavuga ko bari babwiwe ko bazajya bahabwa amafaranga uko hashize iminsi 10 ariko bakaba barateye umuti iminsi 10 yashira ntibahabwe amafaranga yabo nkuko bari babyijejwe n’ubuyobozi bw’ibitaro bya Rwamagana .

Imwe mu mirenge abajyanama bayikoreyemo bahawe ayo mafaranga ariko abandi ntibayabwa bakaba bakishyuza .

Abajyanama b’ubuzima batewe impungenge no gusiragizwa bishyuza ndetse bemeza ko nta kizere cy’uko bazahabwa amafaranga y’agahimbazamusyi y’amahugurwa bakoze kuva tariki ya 24 kugeza kuri tariki ya 29 Mata 2019 .

Umwe mu bajyanama ubarizwa muri ‘Koperative Ingobokabuzima’ yo mu Murenge wa Kigabiro, yabwiye Bwiza .com ko basiragizwa bajya kwishyuza amafaranga.

Aragira ati: “Twakoze amahugurwa tuyamaramo iminsi 5 batubwira ko bazaduha amafaranga ubu ukwezi kurashize dutegereje ayo mafaranga kandi dufite ubwoba ko batazayaduha kuko twarahugurwaga ariko ntibagire aho batwandika nibura twizere ko bazaduha amafaranga ikindi batubwiraga ko tuzajya dukora iminsi 10 yashira bakaduha amafaranga ndetse ubu barimo kuduhoza mu nzira buri munsi tujya kwishyuza bakatubwira ko hari amakosa yakozwe n’abakoze urutonde rw’abakoze ,turasaba ko baduha amafaranga yacu kugirango turuhuke guhora mu ngendo .”

Ubuyobozi bw’ibitaro bya Rwamagana buvuga ko abajyanama b’ubuzima amafaranga yabo yagejejwe kuri konti z’amakoperetive nkuko byemezwa na Dr Utumatwishima Abdarah uyobora ibyo bitaro.

Yagize ati: “Amafaranga twayahaye amakoperative y’abajyanama b’ubuzima kandi ntagutinda byabayeho uretse koperative imwe yo muri Kigabiro yabayemo ikibazo byatumye batinda kuyabona.”

Nubwo Dr Utumatwishima avuga ko amafaranga bayohereje mu makoperative abajyama b’ubuzima bavuga ko bahawe amafaranga y’iminsi 10 gusa kandi abenshi bayahawe igikorwa cyararangiye kandi ntibayahabwe yose kugeza ubu nta kizere cy’uko bazanahabwa amafaranga bemerewe bakora amahugurwa .

 

Izindi wakunda

Bwiza.com