bwiza.com
Ahabanza » Miliyoni 16 z’Amadolari ya Amerika agiye gushorwa mu mushinga wo kwagura IPRC Musanze
Amakuru Mu mashuli

Miliyoni 16 z’Amadolari ya Amerika agiye gushorwa mu mushinga wo kwagura IPRC Musanze

Kuri uyu wa kane tariki ya 30 Gicurasi 2019 ku Ishuri Rikuru ry’Imyuga n’Ubumenyingiro rya Musanze- IPRC Musanze- riherereye mu Murenge wa Nkotsi, Akarere ka Musanze habereye umuhango wo gushyira ibuye ry’ifatizo ahagiye kubakwa inyubako zifite agaciro ka miliyoni cumi n’esheshatu z’Amadolari ya Amerika yatanzwe na Leta y’Ubushinwa mu rwego rwo kwagura iri Shuri.

Umushyitsi Mukuru muri uyu muhango yari Minisitiri w’Uburezi, Dr Mutimura Eugene; hari kandi Guverineri w’Intara y’Amajyaruguru, Hon Gatabazi Jean Marie Vianney, Ambasaderi w’Ubushinwa mu Rwanda, RAO Hongwei, Inzego z’Umutekano n’abandi Bayobozi batandukanye, abanyeshuri n’abarimu bo muri IPRC Musanze ndetse n’abaturage b’Umurenge wa Nkotsi baturiye iri shuri.

Mu ijambo rye, Minisitiri w’Uburezi yavuze ko imirimo yo kubaka inyubako ziteganyijwe ndetse n’ibikoresho bizazishyirwamo mu rwego rwo kwagura IPRC Musanze zizatwara miliyoni cumi n’esheshatu z’Amadolari ya Amerika kandi ko yose yatanzwe na Leta y’Ubushinwa.

Yaboneyeho gushima ubufatanye hagati ya Leta y’u Rwanda n’Ubushinwa, aho yashimangiye ko ubwo bufatanye bushingiye cyane cyane ku bucuti bukomeye Perezida wa Repubulika y’u Rwanda, Nyakubahwa Paul Kagame afitanye n’Igihugu cy’Ubushinwa, by’umwihariko na Perezida Xi Jinping w’Ubushinwa.

Minisitiri Mutimura yasabye abaturage baturiye IPRC Musanze gukomeza gufatanya na ryo guteza imbere uburezi bw’abana babo no kwiteza imbere bo ubwabo, bahereye ku mahirwe babonye y’imirimo y’inyubako zigiye kuhazamurwa.

Ku ruhande rwe, Guverineri w’Intara y’Amajyaruguru yavuze ko inkunga ya miliyoni cumi n’esheshatu z’Amadolari ya Amerika Ubushinwa bwateye u Rwanda, ikaba ije mu Ntara y’Amajyaruguru izagira uruhare rukomeye mu iterambere ry’iyi Ntara, cyane cyane ko ije kubaka ibikorwaremezo bizafasha urubyiruko kuzamura urwego rw’ubumenyi, ari bwo musingi w’iterambere rirambye ry’Igihugu.

Guverineri Gatabazi yijeje umutekano Abashinwa bagiye gukora imirimo yo kwagura iri Shuri kandi anasaba abaturage kuzababanira neza no kuzabyaza umusaruro aya mahirwe babonye, kuko nk’uko yabishimangiye, imirimo igiye kuhakorerwa izatanga akazi ku batari bake, bityo babone amafaranga azabafasha mu iterambere ryabo.

Ambasaderi w’Ubushinwa mu Rwanda na we yijeje ko Leta y’Igihugu cye ahagarariye, izakomeza gufatanya n’u Rwanda mu mishinga itandukanye igamijwe iterambere n’imibereho myiza y’abaturage.

Nk’uko byatangajwe inyubako ziteganyijwe kubakwa mu rwego rwo kwagura IPRC Musanze zizubakwa ku buso bwa metero kare 41,000, zo ubwazo zikazaba zizaba zifite ubuso bungana na metero kare 7,600 zikazubakwa mu gihe cy’amezi 18. Izo nyubako zizaba zigizwe n’amashuri yo kwigiramo, icyumba kinini cy’inama, amacumbi y’abanyeshuri, inzu za laboratuwari n’izindi zizashyirwamo serivisi zitandukanye.

Izindi wakunda

Bwiza.com
error: Alert: Ntabwo byemewe!!