bwiza.com
Amakuru Politiki

Abanyamuryango ba FPR/Inkotanyi batoye ababahagarariye mu Murenge wa Kigali- AMAFOTO

Abanyamuryango ba FPR/ Inkotanyi bo mu Tugari n’Imidugudu bigize Umurenge wa Kigali, Akarere ka Nyarugenge, mu Mujyi wa Kigali, batoye ababahagarariye muri uyu Murenge. Bemeza ko Komite bashyizeho bayizeye kandi bayibonaho ubushobozi bwo gukomeza kubaka umuryango muri uyu Murenge.

Ni amatora yabaye kuri uyu wa Gatandatu tariki ya 1 Kamena 2019, uwitwa Nizeyimana Emmanuel akaba ari we wabaye Chairman w’uyu muryango muri uyu murenge, uyu mwanya akaba yari awusanzweho none yongeye kugirirwa ikizere.

Uwa Gatatu uturutse Ibumoso, Rutubuka Emmanuel, watorewe kuba Komiseri ushinzwe ubukungu

Mu ijambo yagejeje ku bari bitabiriye aya matora, Nizeyimana yabasabye gukunda uyu muryango banarushaho gukunda no gukorera igihugu cyabo, by’umwihariko ko bagomba gukora nk’abikorera.

Nizeyimana Emmanuel, Chairman wa FPR/Inkotanyi mu Murenge wa Kigali

Ati “Hari abacyuye igihe ariko hari n’abarimo binjira, ikintu cya mbere, twese tujyanwa mu muryango no gukunda igihugu, inshingano buri wese afite, aziteho, azikore neza nk’ukorera igihugu cye kuko uhinga mu kwe ntasigana”.

Abatoreshaga bakusanya amajwi

Visi Chairman watowe ni Mucangando Emmanuel. Komiseri ushinzwe ubukungu ni Rutubuka Emmanuel, usanzwe ari n’Umunyamabanga Nshingwabikorwa w’Umurenge wa Kigali. Komiseri ushinzwe imibereho, ni Safari Patrick. Umunyamabanga ni Kankuyu Christine. Komiseri ushinzwe imiyoborere myiza ni Mutsinzi Antoine naho Komiseri ushinzwe ubutabera ni Gashugi Kunde.

Abatowe muri Komite y’urugaga rw’urubyiruko

Mu rubyiruko, Muhire Claude ni we watorewe kuba Perezida w’Urugaga rw’urubyiruko mu murenge wa Kigali. Aganira na Bwiza.com, yavuze ko hamwe na bagenzi be b’urubyiruko barajwe ishinga no gusigasira ibyagezweho.

Ati “Nk’urubyiruko rubarizwa mu muryango turajwe ishinga no gusigasira ibyagezweho duharanira ubumwe bw’Abanyarwanda n’ubwabanyamuryango ba RPF/Inkotanyi. Ikindi kandi tuzanashyiraho amakoperative kugira ngo turusheho kwiteza imbere”.

Muhire Claude watorewe kuba Perezida w’Urugaga rw’urubyiruko

Ku kiciro cy’abagore, Benihirwe Marie Claire niwe watowe akaba ahagarariye urugaga rw’abagore mu muryango wa FPR/Inkotanyi muri uyu Murenge wa Kigali.

Abanyamuryango ba FPR/Inkotanyi muri uyu Murenge barashima iki gikorwa cy’amatora, bakaba bizeye ko abayobozi batoye hari byinshi bazabagezaho mu iterambere ry’igihugu.

Komite yatowe ihagarariye abagore mu muryango wa FPR/Inkotanyi

Kanyarutoki Dieudonnée ni Chairman w’umudugudu wa Ruhango, mu Kagari ka Ruliba, Umurengwa wa Kigali, akaba umwe mu batoye. Avuga ko abayobozi bagiriye ikizere bakabatora babafitiye ikizere ko bazabageza kuri byinshi.

Kanyarutoki Dieudonnée avugo ko Komite batoye bayizeyeho ubushobozi

Yagize ati “Dufite ikizere ko bazatugeza kuri byinshi kandi byiza dufatanyije, ni komite irimo abantu basanzwe bafite ubunararibonye mu muryango kandi bafite ubushobozi, Chairman wacu nyakubahwa Paul Kagame yashyizeho umurongo mwiza w’iterambere ryubaka igihugu, tukaba twiteguye gukomeza uwo murongo wo gushyira inyungu z’abaturage imbere”.

Umufite Chantal na we ni umunyamuryango wa FPR/Inkotanyi, akaba ari umwe mu batoraga, avuga ko komite batoye bayizeyeho ubushobozi, ati “Ubutumwa tubahaye ni ubwo gukomereza aho byari bigereye tugafatanya n’abaturage b’ingeri zose kubaka igihugu cyacu”.

Aya matora mu muryango wa FPR/Inkotanyi yatangiriye ku Mudugudu, ku wa Gatandatu w’icyumweru gitaha akaba azakomereza ku rwego rw’Akarere, abagiye batorwa mu Mirenge bakaba aribo bazagenda bavamo abakandida mu Karere.

        

Izindi wakunda

Bwiza.com