bwiza.com
Ahabanza » Abasirikare 120 ba RDF basoje amahugurwa y’abayobozi ba segisiyo-amafoto
Amakuru Umutekano

Abasirikare 120 ba RDF basoje amahugurwa y’abayobozi ba segisiyo-amafoto

Kuri uyu wa gatanu, tariki ya 31 Gicurasi, abasirikare ba RDF 120 basoje amasomo y’abayobozi ba segisiyo harimo aba ‘sergeants’, caporales na ba ‘private’. Muri aba ngaba, harimo ab’igitsina gore 14.

Aba basirikare bose babarizwa muri divisiyo (Infantry Division) ya 1, bari bamaze amezi atatu mu kigo cya gisirikare cya Kami.

Muri uyu muhango wo gusoza aya mahugurwa ku mugaragaro, umuyobozi wa diviziyo ya 1 y’ingabo zirwanira ku butaka, Gen. Maj. Mubarak Muganga yashimiye aba basirikare aya mezi bamaze mu kinyabupfura ndetse bakaba banarigaragaje neza. Yaboneyeho abasaba gukoresha no gusangiza abandi ubumenyi bakuye muri aya mahugurwa.

” Navuga ko ubumenyi mukuye hano buzabafasha kuba abayobozi beza”.

Afande Gen. Maj. Mubarak Muganga yabibukije ko igisirikare cy’u Rwanda cyubatswe n’abari abayobozi, ko ari ahabo gusigasira ubusugire bwacyo, yewe bakanakigeza ku rundi rwego. Ati: ” Igisirikare cyacu kihagazeho ku rwego mpuzamahanga. Ntabwo twasinzira kugeza ubwo tuzagera ku rwego ruri hejuru cyane.”

Muri aya masomo atangwa gatatu mu mwaka, abasirikare bigishwa uburyo bw’imirwanire,kwiga ibimenyetso n’amasomo mboneragihugu.

Segisiyo n’itsinda ry’abasirikare hagati y’umunani n’icumi, Iyoborwa na ‘Sergeant’ akungirizwa na ‘Caporale’. Segisiyo eshatu zikoze platuni, platuni eshatu zigakora kampani, kampani eshatu zigakora batayo.

 

MOD RWANDA

Izindi wakunda

Bwiza.com