bwiza.com
Ahabanza » Rusizi: Batandatu barimo abakozi 2 b’Umurenge bafunzwe bakurikiranyweho imikoreshereze mibi y’umutungo
Amakuru Politiki

Rusizi: Batandatu barimo abakozi 2 b’Umurenge bafunzwe bakurikiranyweho imikoreshereze mibi y’umutungo

?

Amakuru aturuka mu Murenge wa Nkungu mu karere ka Rusizi aravuga itabwa muri yombi ry’umucungamutungo wa Tubeho SACCO y’uwo murenge, Habimana Ernesto Amos n’umukozi w’uwo murenge ushinzwe amakoperative n’iterambere ry’ishoramari, Niyoyonyine Simplicier na Bane mu rubyiruko rw’uyu murenge bari baravuye Iwawa, bose bazira ubufatanyacyaha mu mikoreshereze
mibi y’amafaranga yari agenewe guteza imbere urwo rubyiruko.

Nk’uko Bwiza.com yabitangarijwe n’Umunyamabanga Nshingwabikorwa w’umurenge wa Nkungu, Sindayiheba Aphrodis, ngo aba bose batawe muri yombi ku wa 28 Gicurasi uyu mwaka hamaze kugaragara imikoreshereze mibi y’amafaranga agera kuri miliyoni 5 z’amanyarwanda abasore 7 bari baravuye ku gororwa no kwigishwa amasomo y’imyuga ku kirwa cya Iwawa bari
baragurijwe n’ikigega cy’ingwate( BDF) ngo abafashe kwiteza imbere.

Uyu muyobozi yakomeje atangariza Bwiza.com ko aya mafaranga yaciye muri uyu murenge SACCO uyu mucungamutungo wawo n’uyu mukozi w’umurenge ushinzwe amakoperative n’iterambere ry’ishoramari bari muri komite ishinzwe gucunga imikoreshereze yayo no gukurikirana ibikorwa by’urwo rubyiruko, aba basore ngo bakaba bari bahisemo umushinga wo kubyaza umusaruro
amashyamba aboneka muri uyu murenge,aho bagombaga kujya bagura ishyamba bagatwika amakara bakanabazamo imbaho byose bikagurishwa, bakanagura imashini y’amafaranga 1.100.000 yo gufasha mu gukora agakiriro gacirirtse bajya bakoreramo n’ibindi byabafasha mu iterambere.

Ngo baguze amashyamba 2, rimwe bishyura amafaranga 900.000 irindi baryishyura 700.000 bishyura na Hangari ayo makara n’imbaho bizajya bibikwamo mbere yo kugurishwa, ariko bimwe mu bindi bagombaga kugura bigaragara ko amafaranga yasohotse ariko ntibigurwe, hakaba n’andi bishyuraga
make,mu mpapuro bakongeraho amazeru bikitwa ko hasobohotse menshi kandi atari byo.

Gitifu Sindayiheba ati’’ Nibyo bari mu maboko y’inzego z’umutekano bakurikiranyweho ubufatanyacyaha mu micungire mibi y’amafaranga 5.000.000 y’inguzanyo ya BDF yari agenewe kuzamura urubyiruko rwavuye Iwawa. Aba basore bavuye Iwawa mu Gushyingo umwaka ushize, bayahabwa mu mpera za Werurwe uyu mwaka ngo bayabyaze umusaruro biteze imbere
bazakuremo n’ubwishyu bagombaga kuyishyuraho nyuma y’iyunguka ry’umushinga wo gusarura amashyamba no kugurisha amakara n’imbaho zayavagamo no gukora agakiriro gaciriritse bari bateganije.’’

Yakomeje ati’’ Icyagaragaye ni uko amafaranga yagiye abikuzwa agakoreshwa nabi no mu buryo butemeranijweho, ntiyakora ibyo yari ateganirijwe gukora byose,kuko hari nk’ayasohotse ngo akodeshwe inzu y’agakiriro gaciriritse bakavuga ko yakodeshejwe ariko iyo nzu ntigaragare, bavuga ko baguze Cash power ntayo tubona, ikibabaje kurusha ibindi kikaba amafaranga 60.000 bagombaga kwishyura abarura amakara, byagombaga gukorwa mu byiciro 2, bakagenda bongeraho 0 inyuma y’amafaranga 30.000 ya buri cyiciro bikitwa ko abarura amakara bishyuwe amafaranga 300.000 yose hamwe aba 600.000 kandi yari 60.000, n’andi yagiye mu buryo nk’ubwo ku buryo kuri konti hasigayeho amafaranga 1.200.000 gusa, bariya basore 4 na bo bakaba barafatanyaga na bo.’’

Uyu muyobozi avuga ko bategereje icyemezo cy’ubushinjacyaha ngo harebwe ikindi cyakorerwa aba basore 3 basigaye,aba 4 ngo mbere yo kugezwa mu bugenzacyaha bakaba baremereye ubuyobozi bw’umurenge amakosa yabo muri iki kibazo.

Bibaye mu gihe hari hashize iminsi mike mu murenge wa Bweyeye muri aka karere na bwo hatawe muri yombi abantu 4 barimo umucungamutungo wa SACCO yawo,umubaruramari,ushinzwe inguzanyo n’uhagarariye komisiyo y’igihugu y’amatora muri uyu murenge,aho bashinjwaga ubufatanyacyaha mu gukoresha amafaranga asaga miliyoni 16 ibyo atari agenewe, bakaba
bararekuwe bamaze kwishyura ½ cyayo bahita banirukanwa ku mirimo yabo,umuyobozi w’aka karere,Kayumba Ephrem akaba yabwiye Bwiza.com ko aba bose bagaragarwaho n’imicungire mibi y’umutungo wa rubanda bahagurukiwe ngo babiryozwe kandi ngo batazihanganirwa.

Izindi wakunda

Bwiza.com
error: Alert: Ntabwo byemewe!!