bwiza.com
Ahabanza » Ruswa iracyari ikibazo kandi ikanagera no ku baturage batoya- Murekezi Anastase
Amakuru Politiki

Ruswa iracyari ikibazo kandi ikanagera no ku baturage batoya- Murekezi Anastase

Umuvunyi Mukuru, Murekezi Anastase avuga ko mu gihugu hakiri ikibazo gikomeye cya ruswa by’umwihariko ko no ku baturage baciriritse ibageraho.

Umuvunyi Mukuru atangaje ibi nyuma y’urutonde rw’abahamwe n’icyaha cya ruswa rwashyizwe hanze n’urwego rw’umuvunyi kuva muri Kanama 2018, kugera muri Mutarama 2019,aho bigaragara ko mu nzego zitandukanye ruswa ikomeza kuharangwa.

Yagize ati “Amasoko amasosiyeti yigenga ahuriraho n’inzego za Leta akaza ku mwanya wa Gatatu na 33% urabona ko ruswa ikiri ikibazo kandi ikagera no ku baturage batoya, nka hariya kugira ngo ubone inka muri gahunda ya Girinka 22% by’abaturage bakavuga bati ‘harimo ruswa’.

Akomeza avuga ko mu mitangire y’ibyangombwa byo kubaka  naho haza ku isonga mu hatangirwa ruswa, ati “Perimi zo kubaka ndetse ukazihuza no kubaka ahantu hatemewe urabona ko hari ikibazo”.

Abahamwe na ruswa muri icyo gihe harimo abahinzi 15, abashoferi 11, abacuruzi Umunani, abakora ibitazwi batanu n’abakoresha ba VUP Bane.

Urwego rw’Umuvunyi ruvuga ko rugiye gukaza umurego mu guteza cyamunara imitungo y’abahamwe n’iki cyaha cya ruswa ruvuga ko kigikomeye. Amafaranga agomba kugaruzwa hashingiwe ku manza za ruswa akaba asaga Miliyari.

Nk’uko biteganywa mu itegeko N°54/2018 ryo ku wa 13/08/2018 ryerekeye kurwanya ruswa, bisobanurwa ko ruswa ari igikorwa icyo ari cyo cyose gikorewe mu nzego za Leta, iz’abikorera, sosiyete sivili, n’imiryango mpuzamahanga ikorera cyangwa ishaka gukorera mu Rwanda, kigamije gusaba, kwakira cyangwa gutanga indonke hagamijwe kwigwizaho umutungo udashobora gusobanura inkomoko yawo mu buryo bunyuranyije n’amategeko cyagwa gukora ishimishamubiri kugira ngo hakorwe umurimo cyangwa igikorwa mu buryo bunyuranije n’amategeko byaba bikozwe na nyir’ubwite cyangwa binyujijwe ku wundi muntu.

Gusaba, kwakira cyangwa gutanga indonke Umuntu wese usaba, utanga cyangwa wakira, mu buryo ubwo ari bwo bwose, indonke iyo ari yo yose, kuri we cyangwa ku wundi muntu cyangwa wemera amasezerano yabyo kugira ngo akore cyangwa adakora ikiri mu nshingano ze cyangwa yifashishije imirimo ye kugira ngo gikorwe cyangwa kidakorwa aba akoze icyaha. Iyo abihamijwe n’urukiko, ahanishwa igifungo kirenze imyaka itanu (5) ariko kitarenze imyaka irindwi (7) n’ihazabu y’amafaranga y’u Rwanda yikubye inshuro kuva kuri eshatu (3) kugeza kuri eshanu (5) z’agaciro k’indonke yatse cyangwa yakiriye.

Ibihano bivugwa mu gika cya 2 cy’iyi ngingo ni na byo bihabwa umuntu wese utanga cyangwa usezeranya gutanga, mu buryo ubwo ari bwo bwose, indonke iyo ari yo yose, kuri we cyangwa ku wundi muntu kugira ngo hatangwe cyangwa hadatangwa serivise.

Iyo ibikorwa bivugwa mu gika cya mbere n’icya 3 by’iyi ngingo byakozwe kugira ngo hakorwe ikinyuranyije n’amategeko, igihano kiba igifungo kirenze imyaka irindwi (7) ariko kitarenze imyaka icumi (10) n’ihazabu y’amafaranga y’u Rwanda yikubye inshuro kuva kuri eshatu (3) kugeza kuri eshanu (5) z’agaciro k’indonke yatse, yakiriye cyangwa yatanze.

 

 

 

Izindi wakunda

Bwiza.com
error: Alert: Ntabwo byemewe!!