bwiza.com
Ahabanza » Abapolisi bato 1342 basoje amahugurwa i Gishari- AMAFOTO
Amakuru Politiki

Abapolisi bato 1342 basoje amahugurwa i Gishari- AMAFOTO

Abapolisi bato 1342 bari bamaze amezi agera ku icumi bahugurwa mu kigo cy’amahugurwa cya Polisi i Gishari, bayasoje kuri uyu wa Mbere tariki ya 3 Kamena 2019.

Minisitiri w’Ubutabera akaba n’intumwa nkuru ya Leta, Busingye Johnston wari umushyitsi mukuru muri uyu muhango, yabahaye impanuro zo kuba intangarugero mu kazi kabo bagiye gutangira no gutanga umusanzu wo kongera ingufu mu bikorwa byo kubungabunga umutekano mu gihugu no hanze yacyo.

Yagize ati “Gucunga umutekano ntibigarukira mu gihugu cyacu gusa kuko Polisi y’u Rwanda yitabazwa n’Umuryango w’Abibumbye n’indi miryango nka Afurika Yunze Ubumwe mu kugarura umutekano mu bihugu by’amahanga bifite ibibazo by’umutekano”.

Yakomeje ababwira ko Polisi y’u Rwanda igira uruhare rukomeye mu gushyira mu bikorwa gahunda za Leta nko gufatanya n’abaturage mu kwicungira umutekano, gukora umuganda rusange n’ibindi bikorwa bitandukanye bigamije iterambere ry‘igihugu n’imibereho myiza y’abaturage. Ati “Abapolisi bashya murasabwa umusanzu wo kongera ingufu muri ibyo bikorwa bihesha igihugu cyacu ishema”.

Umuyobozi w’ishuri rya Polisi rya Gishari (PTS), Commissioner of Police ( CP) Vianney Nshimiyimana, yavuze ko ari icyiciro cya 15 cy’amahugurwa y’ibanze aba bapolisi bato basoje nyuma y’amezi 10 bamaze batozwa, by’umwihariko ko amasomo bahawe azabafasha kunoza akazi kabo.

Yagize ati “Mu gihe cy’amezi cumi bamaze hano, aba banyeshuri bize amasomo azabafasha gutunganya umwuga wa gipolisi arimo: Imirimo ya Polisi y’Urwanda; gukoresha intwaro; kubungabunga umutekano mu gihugu no mu mahanga; ibikorwa bya polisi”.

Yakomeje agira ati “Abanyeshuri kandi bigishijwe ikoranabuhanga mu iperereza; amategeko; ubufatanye bwa polisi n’abaturage; ubutabazi bw’ibanze; imyitozo ngororamubiri; ibiganiro ndetse n’andi masomo atandukanye y’ingirakamaro mu mirimo ya polisi y’igihugu”.

Ni amahugurwa yatangiye tariki 13 Kanama 2018 agizwe n’abanyeshuri 1400, basoje ari 1342, barimo ab’igitsinagore 197.  CP Vianney Nshimiyimana akavuga ko abanyeshuri 58 batashoboye kurangiza amahugurwa kubera impamvu zitandukanye.

 

Izindi wakunda

Bwiza.com
error: Alert: Ntabwo byemewe!!