bwiza.com
Ahabanza » Basketball: Umunyarwanda Yves Nkurunziza mu nzozi zo gutoza Abanyarwanda bakiri bato
Amakuru Imikino

Basketball: Umunyarwanda Yves Nkurunziza mu nzozi zo gutoza Abanyarwanda bakiri bato

Umutoza w’ Umunyarwanda mu mukino wa Basketball, utuye muri Leta Zunze  za Amerika,  Yves Nkurunziza yemeza ko akomeje gukabya inzozi ze ndende zo  kuzatoza abakinnyi bato mu Rwanda bakazagera ku rwego rwa NCAA na NBA muri Amerika bityo nawe akazaba umutoza ukomeye ku rwego rw’isi.

Ibi Yves Nkurunziza yabishimangiye mu kiganiro kirambuye yagiranye na Bwiza.com ku murongo wa telefoni agira icyo atangaza ku buzima bwe muri rusange ndetse n’ urugendo rwe mu mukino wa basketball.

Bwiza.com: Muraho neza Yves? Amakuru yanyu aho muri Nevada?

Yves Nkurunziza: Turaho neza Bwiza.com, nizere ko mu Rwagasabo mumeze neza! Yewe urukumbuzi ni rwinshi cyane!

Bwiza.com: Mushobora kwibwira abasomyi bacu, mu ncamake, cyane cyane abakunzi ba siporo muri rusange ndetse na basketball by’ umwihariko?

Yves Nkurunziza: Nitwa uko{Yves Nkurunziza(Yverson)}, ndi Umunyarwanda ariko ku bw’ amateka y’ igihugu cyanjye navukiye i Bujumbura mu gihugu cy’ u Burundi mu mwaka w’ i 1984.

Bwiza.com: Ni gute waje kwisanga mu mukino wa Baskeball, aho watangiriye, amakipe wakinnyemo ndetse n’amakipe wabereye umutoza ?

Yves Nkurunziza: Uburyo naje kwisanga muri basketball ni igitangaza ndetse ni umugambi w’ Imana kuko tumaze gutaha mu gihugu cyacu cy’ amavuko muri 1994 nyuma ya jenoside yakorewe Abatutsi twakodesheje inzu y’ umugabo witwaga Gisembe wari umukinnyi w’ umuhanga muri Basketball ariko aza kwicwa muri jenoside.

Aho niho natangiriye kumva amateka ya Gisembe bituma ntangira gukunda uwo mukino bitewe ni uko  twari twegereye Club Rafiki natangiye kujya njyana n’ abandi bana ubwo dutangira kwitoza.

Uyu ni Nkurunziza ari kumwe n’umutoza mushya wa Cleveland Cavaliers, John Beilein

Ntabwo nzibagirwa umugabo witwa Hashim kuko niwe watangiye kuntoza ananyereka uko bigenda, njye na bagenzi banjye atangira kutwigisha amategeko y’ibanze agenga basketball.

Ku ikubitiro niga mu mashuri abanza nabaye umukinnyi wa Saint Joseph i Kabgayi nyuma nza gukinira ikipe ya AGF ndetse na Espoir BC.

Nyuma yaho nagiye gukinira ikipe ya Ndege University i Kampala muri Uganda, gusa ntibyangedekeye neza kuko nyuma y’ igihe gito nahise mvunika ariko mpita mba umutoza wungirije w’ iyi kipe.

Umwaka umwe mbere yo kuza hano muri USA nabaye umutoza w’ ikipe KBC (Kigali Basketball Club) .

Uyu ni Coach Tom Billeter akaba yari Champion muri NCAA II muri 2016

Bwiza.com: N’ibihe bihe byiza waba waragize muri Basket hano mu Rwanda,ni iki cyakubabaje cyane muri uyu mukino?

Yves Nkurunziza: Ibyiza ni byinshi cyane kuko basketball yampuje n’ abantu benshi kandi bambereye ingirakamaro kuko n’ uburyo mbayeho uyu munsi ibifitemo uruhare.

Bwiza.com: Ubwo urashaka kuvuga iki?

Yves Nkurunziza: Eehh!nashakaga kubabwira ko basket ifite umwanya w’ ingenzi mu buzima bwanjye.

Bwiza.com: Ese ni iki cyakubabaje cyane muri carreer yawe ya basketball?

Yves Nkurunziza: Ikintu cyambabaje kurusha ibindi ni uburyo ikipe natangiriyemo gukina ariyo St Joseph itigeze itwara igikomebe cya Inter-scolaire kandi twarahoraga tugikozaho imyanya y’intoki.

Bwiza.com:  Ni abahe bantu babaye icyitegererezo mu buzima bwawe bwa basketball?

Yves Nkurunziza: Mpereye mu Rwanda ndashimira cyane Frere Gaspard Gahima wabaye umuyobozi wa St Joseph ndetse wagize uruhare rukomeye mu kuduteza imbere.

Mu rwego mpuzamahanga nakunze uburyo Alan Yverson, Michael Jordan ndetse na Kobe Bryant bakina basketball.

Uyu ni Coach Jim Boeheim wa Syracuse university akaba na Assistant wa USA MENS NATIONAL TEAM.Yatangiye gutoza muri 1970

Bwiza.com: Ese ugiriwe icyizere ukagirwa umutoza w’ ikipe y’ igihugu wazana iki gishyashya?

Yves Nkurunziza: Uyu munsi ntabwo nifuza gutoza abantu bakuru ariko numva ubumenyi mfite muri basketball nafasha abana bakiri bato bafite imyaka y’ amavuko kuva kuri 11 kugeza kuri 18.

Bwiza.com: Kuki witaye mu gutoza abana kurusha abantu bakuru kandi waragize amahirwe yo gutoza abakuru mu Rwanda?

Yves Nkurunziza: Nyuma y’ubunararibonye(experiences) maze kubona mu gutoza basketball, nsanga mu gihugu nk’ u Rwanda bigoranye cyane gutoza abakinnyi bakuze kuko usanga benshi baritoje ubwabo birumvikana ko kubakuramo ibyo bafashe byafata umwanya munini cyane.

Ariko gutoza umwana ukizamuka biroroha kuko azamuka afata ubumenyi (skills) umuhaye bitamugoye atajya n’ impaka z’ urudaca.

Nkurunziza na Ed Janka uyobora Nike Championship Basketball Clinics

Bwiza.com: Ese mu Rwanda habayeho kwibanda mu gutoza no kuzamura abana bakiri bato byatuma basketball irushaho gutera imbere?

Yves Nkurunziza:  Mpereye hano muri Amerika , kugira ngo uyu mukino uzamuke icyizere cyose bagishyira mu ngimbi  bigatuma habaho politiki ihoraho ituma NCAA igemurira NBA abakinnyi beza igihe cyose.

Ibihugu bikomeye byo muri Afurika muri basketball uyu munsi ni nka Misiri ndetse na Nigeria, ariko umwihiriko ni uwa Misiri isigaye ijya muri Amerika igatoranya abatoza b’ inzobere ikabajyana iwabo kugira ngo batoze abana bakiri bato bagifite amahirwe yo kugera kure.

Igice cya kabiri cy’ ikiganiro  kiri mu nzira!

 

 

 

Izindi wakunda

2 Ibitekerezo

Anicet Mwamba 03/06/2019 2:25 pm at 2:25 pm

En tout cas Yves ni umuntu w’ umugabo nzi neza ko ibyo akora abizi akunda basket kandi ni umutoza mwiza

Subiza
Annonciata 04/06/2019 8:51 am at 8:51 am

Ese umwana wage ko mbona akunda basket namuhuza na Hyves gute?

Subiza

Tanga Igitekerezo

Bwiza.com
error: Alert: Ntabwo byemewe!!