bwiza.com
Amakuru Politiki

Rubavu: Abagabo 13 bakurikiranweho kwiba za mudasobwa mu mashuri atandukanye

Ubushinjacyaha ku Rwego Rwisumbuye rwa Rubavu bwaregeye urukiko  rwisumbuye rwa Rubavu  dosiye iregwamo abagabo 13 bakekwaho ibyaha by’ubujura bwa za mudasobwa mu mashuri.

Agatsiko k’aba bajura kakaba karatawe muri yombi nyuma y’uko mu ntangiriro z’uyu mwaka bamaze kwiba ku bigo by’amashuri binyuranye, mudasobwa zigendanwa zitagira ingano, bakaziba baciye icyuho.

Hamwe muho bibye ni aha hakurikira: tariki  ya 26/01/2019 bibye Computers 14 mu rwunge rw’amashuri rwa Kavumu; tariki  ya 4 bishyira tariki 5/05/2019  bibye Computers 45 kigo cy’ishuri cya Karugarika; kuri GS Mukondo hibwe Computers 50 tariki ya 13/05/2019, ndetse n’ ikigo cya Gatebe mu karere ka Nyabihu naho bahibye Computers 32. Zimwe muri iri izi mudasobwa zikaba zarabashije kugaruzwa.

Mu rwego rw’amategeko aba bagabo bakurikiranyweho impurirane mboneza byaha by’ubujura bukoreshejwe guca icyuho, ndetse no gushyiraho umutwe w’abagizi ba nabi ugamije kwiba, nk’uko biteganywa mu ngingo za 61, iya 167 n’iya 224 zo mu Itegeko riteganya ibyaha n’ibihano.

Ibihano kuri ibibyaha bikaba bishobora kugera ku myaka 15 y’igifungo n’ihazabu y’amafaranga y’ikubye inshuro 2 z’agaciro k’ibyibwe nk’uko iyi nkuru dukesha Ubushinjacyaha Bukuru ikomeza ivuga.

Biteganyijwe ko uru rubanza ruzaburanishwa ku wa 03 Kamena 2019 haburanwa ifunga n’ifungurwa ry’agateganyo.

 

Izindi wakunda

Bwiza.com